Maharashtra News Highlights : “अजित पवार राज्याचे मुख्यमंत्री झाल्याशिवाय…”, बाबासाहेब पाटील यांचं विधान चर्चेत

राज्यातील महायुती सरकारने लाडकी बहीण योजनेसाठी आदिवासी विभागाचा तब्बल ३३५ कोटी रुपयांचा निधी महिला व बालविकास विभागाकडे वळवल्याचा आरोप विरोधी पक्षांकडून होत आहे. याआधी सामाजिक न्याय विभागाचा निधी वळवल्याचा आरोप झाला होता. मंत्री संजय शिरसाट यांनी यावरून जाहीर नाराजी व्यक्त केली होती. तसेच अनुसूचित जातींसाठीचा निधी देखील वळवल्याचा आरोप होत आहे. या सगळ्या आरोपांवर मुख्यमंत्री देवेंद्र फडणवीस यांनी प्रतिक्रिया दिली आहे. फडणवीस म्हणाले, “लाडकी बहीण योजनेसाठी इतर विभागांचा निधी पळवल्याचा आरोप केला जात आहे तो पूर्णपणे खोटा आहे. हा अतिशय चुकीचा दावा आहे. अर्थसंकल्पाची पद्धत ज्यांना समजत नाही ती मंडळी असा आरोप करू शकतात”.

वाचा सविस्तर

शिवसेना ठाकरे गटाचे खासदार संजय राऊत यांनी मनसे अध्यक्ष राज ठाकरे यांना त्यांचं 'नरकातला स्वर्ग' हे पुस्तक पाठवलं आहे. या संदर्भातील माहिती खासदार संजय राऊत यांनी फेसबुकवर पोस्ट शेअर करत दिली आहे. या फेसबुकवर पोस्टमध्ये संजय राऊत यांनी म्हटलं की, "लपवण्यासारखे काही नाही.'नरकातला स्वर्ग'ची प्रत श्री.राज ठाकरे यांना पाठवली, हे पुस्तक सगळ्यांसाठी आहे."

लपावण्या सारखे काही नाही;
नरकातला स्वर्ग ची प्रत श्री.राज ठाकरे यांना पाठवली,हे पुस्तक सगळ्यांसाठी आहे!
जय महाराष्ट्र! pic.twitter.com/aq08sFtnBB

— Sanjay Raut (@rautsanjay61) May 29, 2025

"आम्ही ऑगस्ट महिन्यात नांदेडमधून मुंबईपर्यंत लॉन्ग मार्च काढणार आहोत. ओबीसी समाजाला एकत्र आणण्यासाठी आणि खऱ्या ओबीसींच्या बाजूने उभे राहण्यासाठी आणि येणाऱ्या निवडणुकीत ओबीसींनी ओबीसींना मतदान करण्यासाठी व खोट्या ओबीसींच्या प्रमाणपत्रावर जे निवडणुकीला उभे राहतील त्यांना बाजूला करायचं ही आमची भूमिका आहे. या राजकीय नेत्यांना मला सांगायचं आहे की तुमच्या आमदाराकीचा, खासदारकीचा आणि मुख्यमंत्री पदाचा मार्ग आमच्या गावगाड्यातील ओबीसींच्या वाड्यातून जातो. पण तुम्ही जर आमच्या आरक्षणाला धक्का लावण्याचा प्रयत्न करत असाल तर आमचा हा लॉन्ग मार्च काढणार आहोत. मनोज जरांगे ज्या दिवशी उपोषणाला बसतील त्याच दिवशी आमची ओबीसींची संघर्ष यात्रा मुंबईपर्यंत जाईल. आमचा इशारा राज्याच्या मुख्यमंत्र्यांना आणि ओबीसीचे झोपडे उध्वस्त करायला निघालेल्या मनोज जरांगेंना आहे", असं लक्ष्मण हाके यांनी म्हटलं आहे.

पुण्याच्या मुळशी तालुक्यातील वैष्णवी हगवणे आत्महत्या प्रकरणाची देशभर चर्चा चालू आहे. या प्रकरणावर गुरुवारी पुणे न्यायालयात सुनावणी झाली. यावेळी न्यायालयाने वैष्णवीचा सासरा राजेंद्र हगवणे, दीर सुशील हगवणे या दोघांना तीन दिवसांची पोलीस कोठडी, तर वैष्णवीचा नवरा शशांक, नणंद करीश्मा व सासू लता या तिघांना एक दिवसाची पोलीस कोठडी सुनावली आहे. दरम्यान, यावेळी न्यायालयात हगवणे कुटुंबाच्या वकिलांनी त्यांच्या आशिलांची बाजू मांडत असताना वैष्णवीबाबत अनेक मोठे दावे केले आहेत.

सविस्तर वाचा