Maharashtra News Updates : महाराष्ट्र राजभवनाचे नाव आता ‘महाराष्ट्र लोकभवन’; मुख्यमंत्री देवेंद्र फडणवीसांनी दिली माहिती

अभिनेते सयाजी शिंदे म्हणाले, "कुंभ मेळे व्हावेत किंवा होऊ नयेत हा काही माझा प्रश्न नाही. कुंभ मेळे व्हावेत, जत्रा व्हाव्यात, सण साजरे करावेत, आमचा त्याला काही विरोध नाही. त्यामुळे तुम्ही आम्हा आंदोलकांबाबत बोलताना विचार करा. झाडं वाचावीत एवढंच माझं म्हणणं आहे, दुसरं काहीच म्हणणं नाही. वृक्षपुनर्रोपनाच्या नावाखाली विनाकारण खर्च करू नका, लोकांची दिशाभूल करू नका. वृक्षपुनर्रोपनाचा हिशेब आजवर कधी मिळाला नाही. ३३ कोटी झाडांचा हिशेब सरकारने कधी दिला नाही. रस्त्यांलगतची झाडं तोडली. त्याबदल्यात दुसरी झाडं लावू असं सांगितलं होतं, ती झाडं लावली का? कुठे लावली? याबाबत काही सांगितलं नाही. आजवर झालं ते झालं. मात्र आता नवी झाडं तोडू नका. झाडं तुटता कामा नयेत. नवी झाडं लावली तर ती टिकली पाहिजेत."

- पार्थ पवार जमीन घोटाळा प्रकरणात काल शीतल तेजवानीला अटक करण्यात आली होती

- पार्थ पवार जमीन घोटाळा प्रकरणात शीतल तेजवानी आरोपी असून पोलिसांकडून त्यांची चौकशी केली जाणार आहे.

- काही वेळापूर्वी त्यांना पोलीस आयुक्तालयात हजर करण्यात आले आहे.

- आता त्यांना न्यायालयात नेलं जाणार आहे.

सत्ताधारी महायुती सरकारने राज्य निवडणूक आयोगाच्या माध्यमातून ईव्हीएम घोटाळा करण्यासाठीच स्थानिक स्वराज्य संस्थांच्या निवडणुकांची मतमोजणी लांबवल्याचा आरोप काँग्रेस नेते विजय वडेट्टीवार यांनी केला आहे. ते म्हणाले, सरकारची अधिवेशनाला सामोरे जाण्याची इच्छा दिसत नाही. सरकार घाबरलंय. शेतकऱ्यांच्या आत्महत्यांत वाढ झाली आहे. महिलांवरील अत्याचार वाढले आहेत. जमीन बळकावण्याचे प्रकार घडत आहेत, जमिनीचे मोठमोठे घोटाळे बाहेर येत आहेत, राज्यात गुंडांची दादागिरी वाढली. सत्ताधारी पक्षांचे आमदार लोकांना कापण्याची, मारण्याची, उडवून देण्याची भाषा करत आहेत. त्यावरून जनता संतापली आहे. त्यामुळे सरकारला आता जनतेची भीती वाटते.

शीतल तेजवानीला अटक केली असली तरी या प्रकरणात संशयाला वाव आहे, असं वक्तव्य माहिती अधिकार कार्यकर्ते (आरटीआय कार्यकर्ते) विजय कुंभार यांनी केलं आहे. कुंभार यांनीच मुंढव्यातील पार्थ पवार जमीन गैरव्यवहार प्रकरण बाहेर काढलं होतं. ते म्हणाले, "पुढच्या आठवड्यात विधानसभेचं अधिवेशन होत असून या अधिवेशनात मुंढव्यातील जमीन गैरव्यवहारावरून गोंधळ होऊ नये म्हणून ही अटक केल्याची शंका उपस्थित होत आहे. त्यामुळे तेजवानी यांना अटक झाल्याबद्दल खूश व्हायचं काही कारण नाही.मुळात या अटकेला टाळाटाळ का केली जात होती असा प्रश्न उपस्थित करायला हवा. तसेच आता दिग्विजय पाटील व पार्थ पवारांनाही अटक करायला हवी", असंही त्यांनी सुचवलं आहे."