Maharashtra News Highlights : “सौ चुहे खाके, बिल्ली…”, अजित पवार गटात होणाऱ्या पक्षप्रवेशाबाबत गुलाबराव पाटलांचे विधान

सावंतवाडी : वैभववाडी तालुक्यात आज गुरुवारी सकाळी वादळी वाऱ्यासह जोरदार अवकाळी पावसाने हजेरी लावली. अचानक आलेल्या या पावसामुळे नागरिकांची तारांबळ उडाली. अनेक ठिकाणी आज विवाह सोहळे आयोजित करण्यात आले होते, या पावसामुळे या सोहळ्यांमध्ये मोठा व्यत्यय आला.

या अवकाळी पावसाचा फटका अंतिम टप्प्यात असलेल्या आंबा आणि काजूच्या पिकालाही बसला आहे. जोरदार वाऱ्यामुळे फळे गळून पडल्याने शेतकऱ्यांचे मोठे नुकसान झाले आहे.

तालुक्यात गेल्या काही दिवसांपासून उष्णतेत मोठी वाढ झाली होती. मात्र, गेल्या दोन दिवसांपासून ढगाळ वातावरण होते आणि आज सकाळी जोरदार वाऱ्यासह पावसाने सुरुवात केली. या पावसामुळे तालुक्यातील कुसर, कुंभवाडे, करूळ, नावळे, खांबाळे या प्रमुख गावांसह अन्य भागांमध्येही जोरदार पाऊस झाला.

नाशिक -वैद्यकीय कायद्यानुसार परवानगी नसतांनाही वेगवेगळ्या आरोग्य पध्दतीचा अवलंब करत उपचार करणाऱ्या वैद्यकीय व्यावसायिकाविरूध्द नांदगाव पोलीस ठाण्यात गुन्हा दाखल करण्यात आला आहे.

नांदगाव तालुक्यातील पिंपरखेड परिसरात दोन ते तीन वर्षांपासून अभिजीत मुखर्जी वैद्यकीय सेवा देत आहेत. त्यांच्याकडे इलेक्ट्रोपॅथीची पदवी आहे. याशिवाय नेचरथेरेपीसह अन्य काही पदव्या आहेत. परंतु, डॉक्टर ही पदवी लावण्यासाठी आवश्यक वैद्यकीय शिक्षण त्यांच्याकडे नाही. त्यांना वेगवेगवेगळ्या पॅथींचा अभ्यास करत उपचार करण्याची परवानगी नसतांनाही ते रुग्णांवर औषधोपचार करत होते. याविषयी आरोग्य विभागाकडे तक्रारी प्राप्त झाल्यानंतर मुखर्जी यांच्या दवाखान्यावर छापा टाकण्यात आला. त्यावेळी वैद्यकीय साहित्य साधनासह ॲलोपॅथीचे उपचार करतांना आढळले. अवैधरित्या वैद्यकीय व्यवसाय करत असल्या प्रकरणी नांदगाव पोलीस ठाण्यात त्यांच्यावर गुन्हा दाखल करण्यात आला आहे.