Maharashtra News Updates : उपमुख्यमंत्री पदावरून मोठ्या घडामोडी, राष्ट्रवादीच्या आमदारांची उद्या बैठक, सुनील तटकरेंनी काय सांगितलं?

राज्याचे उपमुख्यमंत्री अजित पवार यांचं विमान अपघातात अकाली निधन झालं. अजित पवारांच्या निधनानंतर राजकीय क्षेत्रातच नाही तर सर्वच स्तरातून हळहळ व्यक्त करण्यात येत आहे. दरम्यान, अजित पवारांच्या निधनामुळे आता उपमुख्यमंत्रिपदाची जबाबदारी कोणाकडे दिली जाणार? अजित पवारांकडे असलेल्या अर्थ खात्यांची जबाबदारी कुणाकडे दिली जाणार? याबाबत वेगवेगळ्या चर्चा सुरू आहेत. याबाबत बोलताना सुनील तटकरे म्हणाले की, "अजित पवार यांच्या धार्मिक विधीनंतर सुनेत्रा पवार यांच्याशी चर्चा करूनच आम्ही पुढील निर्णय घेणार आहेत", अशी माहिती सुनील तटकरे यांनी माध्यमांशी बोलताना दिली आहे.

केडीएमसी महापौर पदासाठी शिवसेना (शिंदे गट) यांच्या हर्षाली थवील-चौधरी यांनी उमेदवारी अर्ज दाखल केला आहे. तर उपमहापौर पदासाठी भाजपाचे राहुल दामले यांनी उमेदवारी अर्ज दाखल केला. यावेळी खासदार श्रीकांत शिंदे, मनसे नेते राजू पाटील, आमदार राजेश मोरे, भाजपाचे दीपेश म्हात्रे यांच्यासह अनेक पदाधिकारी व कार्यकर्ते उपस्थित होते.