Top 5 Maharashtra Political News March 27: आज २७ मार्च २०२६ रोजी महाराष्ट्राच्या राजकीय पटलावर अनेक खळबळजनक घडामोडी घडल्या. नाशिकचे भोंदूबाबा अशोक खरात प्रकरण आता मंत्र्यांच्या उंबरठ्यापर्यंत पोहोचले असून, दुसरीकडे इंधन संकट आणि लॉकडाऊनच्या अफवांवर सरकारने कडक भूमिका घेतली आहे. जाणून घेऊया आजच्या पाच महत्त्वाच्या बातम्या:
१. “३९ आमदार खरातला भेटले, मग मलाच का लक्ष्य केलं?” – दीपक केसरकर
अशोक खरात प्रकरणात नाव आल्यानंतर माजी मंत्री दीपक केसरकर यांनी शिर्डीत प्रसारमाध्यमांशी संवाद साधला. “खरातच्या दुष्कृत्यांची मला कल्पना नव्हती, मी धार्मिक असल्याने दर्शनाला गेलो होतो. माझ्यासोबत ३९ आमदार खरातला भेटले आहेत, मग केवळ मलाच का लक्ष्य केले जात आहे?” असा सवाल त्यांनी उपस्थित केला. तसेच ईशान्येश्वर मंदिराच्या विश्वस्तांचीही चौकशी करण्याची मागणी त्यांनी केली.
२. रुपाली चाकणकरांना ‘सहआरोपी’ करण्याची मागणी – रुपाली ठोंबरे
झाशीची राणी प्रतिष्ठानच्या अध्यक्षा रुपाली ठोंबरे यांनी खरात प्रकरणात महिला आयोगाच्या अध्यक्षा रुपाली चाकणकर यांच्यावर गंभीर आरोप केले आहेत. “चाकणकर या दलाल म्हणून कार्यरत होत्या. त्यांनी पीडित महिलांवर दबाव आणला,” असा खळबळजनक दावा करत ठोंबरे यांनी चाकणकरांना या गुन्ह्यात सहआरोपी करण्याची मागणी पोलीस आयुक्तांकडे केली आहे.
३. “मंत्र्यांचा एमआयडीसी स्टाफशी काय संबंध?” – सुषमा अंधारे
ठाकरे गटाच्या उपनेत्या सुषमा अंधारे यांनी नाशिकमध्ये पत्रकार परिषद घेत दीपक केसरकर आणि रुपाली चाकणकर यांचे खरातसोबतचे फोटो जाहीर केले. “सिन्नर एमआयडीसीच्या कार्यक्रमात खरातच्या उपस्थितीत चाकणकरांचा सत्कार का झाला? शालेय शिक्षण मंत्र्यांचा तिथे काय संबंध?” असे प्रश्न विचारत त्यांनी या प्रकरणाची एसआयटी (SIT) चौकशी करण्याची मागणी केली आहे.
४. लॉकडाऊन लागणार नाही, अफवा पसरवल्यास जेल! – मुख्यमंत्री फडणवीस
मध्य-पूर्वेतील युद्धामुळे लॉकडाऊन लागणार असल्याच्या अफवा सोशल मीडियावर पसरत आहेत. यावर मुख्यमंत्री देवेंद्र फडणवीस यांनी कडक इशारा दिला आहे. “राज्यात लॉकडाऊन लागणार नाही. जे लोक व्हॉट्सॲप किंवा फेसबुकवर खोट्या पोस्ट शेअर करतील, त्यांच्यावर थेट फौजदारी कारवाई केली जाईल,” असे त्यांनी स्पष्ट केले. तसेच राज्यात तेल आणि गॅसचा तुटवडा नसल्याची ग्वाहीही त्यांनी दिली.
५. लाडकी बहीण योजनेचा हप्ता जमा होण्यास सुरुवात – आदिती तटकरे
लाडकी बहीण योजनेच्या लाभार्थी महिलांसाठी आनंदाची बातमी आहे. फेब्रुवारी महिन्याचा १५०० रुपयांचा हप्ता आजपासून तांत्रिक प्रक्रियेनंतर खात्यात जमा होण्यास सुरुवात झाली आहे. पुढील ३ दिवसांत सर्व महिलांना हे पैसे मिळतील. तसेच ई-केवायसी दुरुस्तीसाठी ३१ मार्च ही शेवटची संधी असल्याचे मंत्री आदिती तटकरे यांनी सांगितले.
