March 28 Maharashtra Top 5 Political News: आज २८ मार्च रोजी महाराष्ट्राच्या राजकारणात दोन मोठे विषय चर्चेत राहिले. पहिले म्हणजे महाराष्ट्राचे माजी उपमुख्यमंत्री अजित पवार यांच्या निधनाला झालेले दोन महिने आणि दुसरे म्हणजे अशोक खरात प्रकरणामुळे रुपाली चाकणकर यांनी दिलेला राजीनामा. जाणून घेऊया आजच्या पाच महत्त्वाच्या घडामोडी:
१. “मन अजूनही तुमच्याच आठवणीत…” – सुनेत्रा पवारांची भावनिक पोस्ट
अजित पवारांच्या निधनाला दोन महिने पूर्ण झाल्यानिमित्त त्यांच्या पत्नी आणि उपमुख्यमंत्री सुनेत्रा पवार यांनी अत्यंत भावूक पोस्ट लिहिली आहे. “काळ पुढे सरकतोय, पण मन अजूनही तुमच्याच आठवणींमध्ये गुंतले आहे. तुम्ही केवळ एक नेते नव्हता, तर आधारस्तंभ होता,” अशा शब्दांत त्यांनी आपल्या भावना व्यक्त केल्या. अजितदादांची कामाची झपाटलेली वृत्ती कायम मार्गदर्शन करेल, असेही त्या म्हणाल्या.
२. “राजीनामा नाही, ही तर गच्छंती!” – सुषमा अंधारेंचा चाकणकरांवर वार
अशोक खरात प्रकरणानंतर रुपाली चाकणकर यांनी महिला आयोगाच्या अध्यक्षपदापाठोपाठ आता राष्ट्रवादी महिला प्रदेशाध्यक्षपदाचाही राजीनामा दिला आहे. यावर शिवसेना (उबाठा) नेत्या सुषमा अंधारे यांनी खोचक टीका केली. “हा राजीनामा नाही, तर गच्छंती आहे,” असे म्हणत त्यांनी चाकणकरांच्या कार्यपद्धतीवर प्रश्नचिन्ह उपस्थित केले. खरात प्रकरणामुळे झालेल्या राजकीय चिखलफेकीनंतर चाकणकरांना पक्षातून बाजूला केल्याची चर्चा आता सुरू झाली आहे.
३. “We miss you, Dada” – सुप्रिया सुळेंनी जागवल्या आठवणी
खासदार सुप्रिया सुळे यांनीही फेसबुकवर अजितदादांच्या आठवणींना उजाळा दिला. “दादा जणू अजूनही आपल्या अवतीभवती आहेत असंच वाटतं,” अशा शब्दांत त्यांनी आपल्या लाडक्या भावाप्रती प्रेम व्यक्त केले. अजितदादांच्या जाण्याने निर्माण झालेली पोकळी अद्याप भरून निघाली नसल्याचे त्यांच्या पोस्टमधून जाणवते.
४. “संघर्ष अखेरपर्यंत चालू राहील” – रोहित पवारांचा निर्धार
आमदार रोहित पवार यांनी अजितदादांच्या अपघाताप्रकरणी तपासासाठी कंबर कसली आहे. “आठवणींचे २ महिने.. ये प्यार और संघर्ष आखिर तक चलता रहेगा,” असे म्हणत त्यांनी दादांच्या मृत्यूला कारणीभूत असलेल्या गोष्टींचा शोध घेण्याचा निश्चय व्यक्त केला. रोहित पवार सध्या या प्रकरणातील पुरावे आणि कागदपत्रे सीआयडी (CID) कडे सोपवत असून गुन्हेगारांना शिक्षा मिळवण्यासाठी आग्रही आहेत.
५. ‘धुरंधर’मधील ऐतिहासिक चुकांवर अंजली दमानियांचे बोट
बॉक्स ऑफिसवर गाजत असलेल्या ‘धुरंधर: द रिव्हेंज’ चित्रपटावर समाजसेविका अंजली दमानिया यांनी पुन्हा एकदा टीका केली आहे. “२०१४ पूर्वीच मृत पावलेल्या पात्रांचा संबंध २०१६ च्या नोटाबंदीशी जोडून कथेची मोडतोड केली गेली आहे,” असा आरोप त्यांनी ‘X’ पोस्टद्वारे केला. सरकारी निर्णयांचे उदात्तीकरण करण्यासाठी इतिहास बदलला जात असल्याचा दावा त्यांनी केला आहे.
