Maharashtra ZP Election Voting Highlights: कराडमध्ये वातावरण तापले! बोगस मतदानाच्या संशयावरून भाजप–राष्ट्रवादी आमनेसामने

सातारा जिल्हा परिषद आणि कराड पंचायत समिती निवडणुकीच्या मतदानादरम्यान कराड तालुक्यातील वडगाव हवेली येथे राजकीय वातावरण तापल्याचे पाहायला मिळाले. बोगस मतदानाच्या संशयावरून भाजप आणि राष्ट्रवादी काँग्रेसच्या कार्यकर्त्यांमध्ये जोरदार वाद झाला. काही काळ मतदान केंद्र परिसरात तणावाचे वातावरण निर्माण झाले होते. मात्र पोलिसांनी वेळीच हस्तक्षेप करत परिस्थिती नियंत्रणात आणली.

सातारा जिल्हा परिषद आणि पंचायत समिती निवडणुकीसाठी आज शनिवारी सकाळपासून मतदान प्रक्रिया सुरू झाली आहे. प्रशासनाने मतदानासाठी मोठी तयारी केली असून मोठ्या प्रमाणात पोलिस बंदोबस्त तैनात करण्यात आला आहे. कराड तालुक्यातील ४८६ मतदान केंद्रांवर मतदान प्रक्रिया सुरू आहे.

परभणीच्या राणीसावरगाव येथे मतदान करण्यापासून रोखल्यामुळे मतदान केंद्रावर वाद निर्माण झाला. महंतांनी थेट मतदान केंद्र अधिकाऱ्यावर भाजपाची दलाली करत असल्याचा आरोप करत, आपल्याला जाणूनबुजून मतदानापासून रोखण्यात आल्याचा दावा केला आहे.या घटनेनंतर परिस्थिती तणावपूर्ण बनली होती. पोलिसांनी मध्यस्थी करण्याचा प्रयत्न केला, मात्र वाद सुरूच राहिला. अखेर महंतांनी मतदान न करताच मतदान केंद्रातून बाहेर पडण्याचा निर्णय घेतला.

मतदान केंद्रावर मतदान करताना आपल्यासह लहान मुलाला बरोबर नेल्याने आमदार विलास भुमरे यांच्यावर टीका होत आहे. याबाबत आता त्यांनी स्पष्टीकरण दिले आहे. ते म्हणाले, तो लहान आहे. त्याला ईव्हीएम वगैरे काही कळत नाही. मी फक्त त्याच्या बोटाला शाई लावली. माझे मतदान मीच केले.