अक्कलकोट (जि. सोलापूर) तालुक्यातील बोरगाव देशमुख गावात एका युवकाने पत्नीसह तीन वर्षीय मुलीची गळा दाबून हत्या करुन स्वतःही गळफास घेऊन आत्महत्या केल्याची धक्कादायक घटना घडली आहे. सतीश बंदीछोडे (वय ३६) असे हत्या करणाऱ्या पतीचे नाव असून पत्नीचे नाव अंदवा (वय २५) आणि मुलीचे वेदिका (वय ३) असे नाव आहे.
सतीश हा गेल्या काही वर्षांपासून पुण्यात नोकरीसाठी राहत होता. सोमवारी रात्री तो पुण्याहून आपल्या पत्नी आणि मुलीला घेऊन देवीच्या दर्शनासाठी शेतात गेला. त्यानंतर त्याने तिथेच पत्नी आणि मुलीचा गळा दाबून खून केला आणि स्वतः गळफास घेऊन आत्महत्या केली. ही घटना मंगळवारी उशिरा उघडकीस आली. दरम्यान, हत्येचे कारण अद्याप स्पष्ट झाले नसले तरी घरगुती वादातून ही हत्या झाल्याची चर्चा आहे. घटनेची अक्कलकोट पोलिसांत नोंद झाली आहे. मात्र या घटनेमुळे परिसरात हळहळ व्यक्त केली जात आहे.
