सातारा साहित्य संमेलनाच्या स्वागताध्यक्षपदी शिवेंद्रसिंहराजे

बैठकीस शाखेचे अध्यक्ष नंदकुमार सावंत, ॲड. चंद्रकांत बेबले, विक्रम पाटील, अजित साळुंखे, संजय माने, सचिन सावंत, वजीर नदाफ, आर. डी. पाटील, अमर बेंद्रे, ज्योती कुलकर्णी, अश्विनी जठार, अनिल जठार, तुषार महामूलकर उपस्थित होते. शिवेंद्रसिंहराजे भोसले यांनी शहर, जिल्ह्यातील साहित्य चळवळीला नेहमीच सक्रिय पाठिंबा दिला आहे. मराठी भाषेला अभिजात भाषेचा दर्जा मिळावा यासाठी पंतप्रधान नरेंद्र मोदी यांनी एक लाख पत्रे लिहिण्याच्या मोहिमेचा शुभारंभही श्री. भोसले यांच्या हस्ते झाला होता. यासाठी त्यांनी दिल्लीत जाऊन आंदोलन केले होते. मुख्यमंत्री देवेंद्र फडणवीस यांच्या माध्यमातून अनेक वेळा त्यांनी पंतप्रधान नरेंद्र मोदी यांच्याकडेही यासाठी पाठपुरावा केला आहे. साताऱ्यात साहित्य संमेलन व्हावे यासाठी त्यांनी सलग १२ वर्षे पाठपुरावाही केला. त्यामुळे स्वागताध्यक्षपदी निवड करण्यात आल्याची माहिती कुलकर्णी यांनी दिली.

वडलांपाठी मुलगा स्वागताध्यक्ष

साताऱ्यात यापूर्वी ६६ वे साहित्य संमेलन १९९३ साली झाले. या संमेलनाचे स्वागताध्यक्ष म्हणून दिवंगत अभयसिंहराजे भोसले यांनी काम पाहिले होते. त्यांच्यानंतर त्यांचे चिरंजीव शिवेंद्रसिंहराजे भोसले यांना स्वागताध्यक्षपदी संधी मिळाली आहे. संमेलनाच्या इतिहासामध्ये वडील आणि मुलगा दोघेही स्वागताध्यक्ष होण्याची ही दुर्मीळ घटना आहे.

शताब्दीपूर्व संमेलन राजधानी सातारा येथे, सर्व सातारकरांच्या सहकार्याने अतिशय देखणे आणि दिमाखदार करून दाखवू. अभिजात मराठी भाषेच्या उत्सवासाठी देश, परदेशांतील सर्व मराठी बांधवांना साताऱ्यात येण्याचे निमंत्रण मी देतो. सर्वांचे आम्ही जोरदार स्वागत करू. शिवेंद्रसिंहराजे भोसले, स्वागताध्यक्ष, अखिल भारतीय मराठी साहित्य संमेलन