Yogesh Kadam : “हट्ट केला असता तर कॅबिनेट मंत्रिपद मिळालं असतं”, मंत्री योगेश कदम यांचं वक्तव्य चर्चेत

योगेश कदम काय म्हणाले?

“जवळपास ५० वर्षांनंतर दापोली मतदार संघाला मंत्रिपद मिळालेलं आहे. ५० वर्ष म्हणजे खूप मोठा कालावधी आहे. त्यामुळे अर्थातच ५० वर्षांची उणीव ही लगेच भरून काढता येत नाही. त्यासाठी अनेक योजना, आताही आपल्या अनेक योजना कार्यरत आहेत. त्या राबवल्या गेल्या पाहिजेत त्यासाठी आपण प्रयत्न करत आहोत”, असं योगेश कदम यांनी म्हटलं आहे.

“योगायोग चांगला आहे की राज्यमंत्री पद माझ्याकडे आहे. पण कदाचित मी हट्ट केला असता तर मला कॅबिनेट मंत्रिपदही मिळालं असतं. मात्र, मी राज्यमंत्री स्वत: मागवून घेतलं. कारण मला माहिती होतं की कॅबिनेट मंत्रिपद मिळालं असतं तर कोणतंही एकच खातं मिळालं असतं आणि तेही कोणतं खातं मिळेल याची काही खात्री नव्हती”, असंही योगेश कदम यांनी म्हटलं आहे.

“पण जर राज्यमंत्री पद घेतलं तर चांगले खाते मिळू शकतात. राज्यमंत्री पदाच्या माध्यमातून आपल्या मतदार संघात आणि आपल्या कोकणात अनेक गोष्टी आपण करू शकतो. माझ्याकडे शहरी गृहराज्य खातं आहे, तसेच महसूल खातं आहे, ग्रामविकास खातं आहे. अन्न नागरी पुरवठा खातं आहे. महसूल खातं आणि ग्रामविकास ही महत्वाची खाती आहेत. ग्रामविकास खात्याच्या माध्यमातून आपण अनेक धोरणात्मक निर्णय घेतले आहेत”, असंही योगेश कदम यांनी म्हटलं आहे.