BMC Election 2026: शिवसेना–मनसेच्या जागा का घटल्या? शर्मिला ठाकरेंनी सांगितले पराभवाचे कारण

निकालानंतर राज ठाकरेंचे निवास असणाऱ्या शिवतीर्थावर विजयी उमेदवारांचे अभिनंदन करण्यात आले आहे. यावेळी राज ठाकरेंची विजयी उमेदवारांनी भेट घेतली. त्यावेळी राज ठाकरेंच्या पत्नी शर्मिला ठाकरे यांनी विजयी उमेदवारांचे औक्षण केले. यावेळी बोलताना शर्मिला ठाकरेंनी महायुतीवर टीका केली. त्या म्हणाल्या, निवडणुकीत भाजपा आणि शिंदे सेनेने पैशांचा वापर केला. विरोधकांनी कल्याण डोंबिवलीसह इतर ठिकाणचे आमचे उमेदवार आणि शाखाध्यक्ष पळविले. तरीही आम्ही लढलो आणि काही ठिकाणी जिंकलो”.

पुढे बोलताना शर्मिला ठाकरे म्हणाल्या, “निवडणूक जवळ आल्या की भाजपाने आमचे नगरसेवक पदाचे उमेदवार पळविले. जी दिसतील त्यांना पैसे देऊन पक्षात घेतले. तरीही कल्याण डोंबिवलीमध्ये आमचे पाच उमेदवार निवडूण आले आहेत. तसेच नवी मुंबईतही आम्ही खाते उघडले आहे. यापूढेही आमची अशीच घोडदौड सुरू राहिल”.

बृहन्मुंबई महानगरपालिकेत आम्ही खूप चांगली लढत दिली आहे. येथे निवडणुकीपूर्वी शिवसेना (उबाठा) आणि मनसेच्या बऱ्याच माजी नगरसेकांना विरोधकांनी त्यांच्याकडे घेतले. तरीही आम्ही येथे चांगले लढलो आहोत. शिवसनेच्या (उबाठा) ६५ तर मनसे ०६ ठिकाणी विजयी झाली आहे.

ठाण्यात एकही जागा नाही-

ठाणे महानगरपालिकेत शिंदेसेनेचे ७५ उमेदवार विजयी झाले आहेत. तर उद्धव ठाकरे गटाचा केवळ एकच उमेदवार विजयी झाला आहे आणि मनसेचे येथे एकही उमेदवार जिंकू शकला नाही. याबद्दल शर्मिला ठाकरेंना विचारले असता त्या म्हणाल्या, “ठाण्यात एकनाथ शिंदे असल्याने त्यांनी आमच्या काही उमेदवारांचे अर्ज विनाकारण रद्द केले. तिथे आमचे उमेदवार आणि कार्यकर्ते पळविले”.