‘दहा वर्षांपासून फक्त गणेशोत्सवापूर्वी आश्वासने आणि डागडुजी’; मुंबई-गोवा महामार्गाच्या दुरवस्थेवर आदित्य ठाकरेंचा घणाघात

कोकण दौऱ्यावर आलेल्या आदित्य ठाकरे यांनी गणेशोत्सवाच्या पार्श्वभूमीवर मुंबई-गोवा महामार्गाच्या कामाची प्रत्यक्ष पाहणी केली. महामार्गावरील खड्डे, अपूर्ण कामे, पुलांची अवस्था, पाणी साचण्याचे प्रकार तसेच बायपास आणि सर्व्हिस रोडच्या दुरवस्थेवर त्यांनी तीव्र नाराजी व्यक्त केली. महामार्गाची पाहणी करताना ‘खड्ड्यांनी माझे स्वागत झाले,’ अशी खोचक टिप्पणीही त्यांनी केली.

मुंबई-गोवा महामार्गाचे चौपदरीकरण गेल्या अनेक वर्षांपासून रखडले आहे. गणेशोत्सवाच्या काळात कोकणात मोठ्या प्रमाणावर वाहतूक वाढते. अशा परिस्थितीत महामार्गाचे काम पूर्ण होणे अपेक्षित असताना दरवर्षी तात्पुरती डागडुजी करून परिस्थिती हाताळली जात असल्याचा आरोप ठाकरे यांनी केला.

महामार्गाच्या कामाची पाहणी करताना काही ठिकाणी नव्याने बांधलेल्या पुलांची अवस्थाही त्यांनी निदर्शनास आणली. ‘काही दिवसांपूर्वीच उद्घाटन झालेल्या पुलाचीही दुरवस्था झाली असेल, तर महामार्गाच्या कामाच्या गुणवत्तेचा अंदाज येतो,’ अशी टीका त्यांनी केली.

महामार्गासाठी नागरिकांकडून टोलच्या माध्यमातून मोठ्या प्रमाणावर पैसा घेतला जात असताना त्याच्या तुलनेत दर्जेदार रस्ता मिळत नसल्याचा आरोपही त्यांनी केला. ‘जनतेकडून टोलचे हजारो कोटी रुपये घ्यायचे, जाहिरातींवर मोठ्या प्रमाणात खर्च करायचा आणि कोकणवासीयांना खड्ड्यांतून प्रवास करायला लावायचे,’ अशी टीका त्यांनी केली.

गणेशोत्सवासाठी मुंबई, पुण्यासह राज्याच्या विविध भागांतून लाखो नागरिक कोकणात येतात. त्यामुळे सणाच्या काळात महामार्गावर मोठ्या प्रमाणात वाहतूक कोंडी होण्याची शक्यता असते. या पार्श्वभूमीवर केवळ खड्डे बुजविण्याची तात्पुरती कामे न करता महामार्गाचे रखडलेले काम आणि संबंधित पायाभूत सुविधा दर्जेदार पद्धतीने पूर्ण करणे आवश्यक असल्याचे ठाकरे यांनी सांगितले.

त्यांच्या दौऱ्याची घोषणा झाल्यानंतर काही ठिकाणी खडी टाकून खड्डे बुजविण्याचा प्रयत्न करण्यात आल्याचा दावाही त्यांनी केला. ‘ही सक्रियता प्रशासन आधीच का दाखवत नाही?’ असा सवाल त्यांनी उपस्थित केला. महामार्गाच्या पाहणीदरम्यान काही ठिकाणी अंडरपासमध्ये मोठ्या प्रमाणावर पाणी साचल्याचे त्यांच्या निदर्शनास आले. स्थानिक नागरिकांना दररोज अशा परिस्थितीतून मार्ग काढावा लागत असल्याचे त्यांनी सांगितले. काही ठिकाणी रस्त्यावर मोठी डबकी आणि चिखल असल्याचेही त्यांनी निदर्शनास आणले.

महामार्गावरील कामाचा प्रश्न केवळ खड्ड्यांपुरता मर्यादित नसून, पुलांचे बांधकाम, अंडरपास, बायपास, सर्व्हिस रोड आणि वाहतूक सुरक्षेशी संबंधित अनेक बाबींचा तो प्रश्न असल्याचे ठाकरे यांनी स्पष्ट केले. मुंबई-गोवा महामार्ग हा कोकणासाठी अत्यंत महत्त्वाचा मार्ग आहे. गेल्या अनेक वर्षांपासून चौपदरीकरणाचे काम सुरू असूनही अद्याप पूर्णत्वास गेलेले नाही. दरवर्षी गणेशोत्सवापूर्वी काम पूर्ण करण्याची आश्वासने दिली जातात; मात्र प्रत्यक्षात प्रवाशांना खड्डे, चिखल, वाहतूक कोंडी आणि अपूर्ण कामांचा सामना करावा लागतो, अशी भूमिका ठाकरे यांनी मांडली.