राज्यातील आणखी एक परीक्षा रद्द! गोंधळाच्या तक्रारींनंतर उच्च न्यायालयाचा निर्णय; लिपीक भरतीची टायपिंग परीक्षा पुन्हा कधी होणार?

काय आहे नेमके प्रकरण?

मुंबई उच्च न्यायालयाच्या आस्थापनेवरील १,३६२ लिपीक पदांच्या भरतीसाठी ही प्रक्रिया राबवली जात आहे. यामध्ये मुंबई मुख्य पीठासाठी ८३०, नागपूर खंडपीठासाठी १६६ आणि छत्रपती संभाजीनगर खंडपीठासाठी ३६६ पदांचा समावेश आहे. सुमारे १३ हजार उमेदवार या परीक्षेसाठी पात्र ठरले होते.

१६ ऑगस्ट रोजी घेतलेल्या टायपिंग परीक्षेदरम्यान राज्यातील अनेक केंद्रांवर प्रचंड तांत्रिक सावळागोंधळ पाहायला मिळाला. सर्व्हर डाऊन होणे, हार्डवेअरमधील बिघाड, सॉफ्टवेअरची संथ गती, परीक्षा सुरू असतानाच सिस्टीम अचानक लॉगआऊट होणे आणि वेगवेगळ्या वेळी परीक्षा सुरू होणे, अशा गंभीर समस्यांना उमेदवारांना सामोरे जावे लागले.

उमेदवारांचा आक्षेप आणि आंदोलन

या तांत्रिक अडचणींमुळे टायपिंगच्या वेगावर आणि कामगिरीवर थेट परिणाम झाला. टायपिंग परीक्षेत किमान १० गुण मिळवणे अनिवार्य असून, त्यात अपयशी ठरल्यास उमेदवारांना प्रक्रियेतून थेट बाहेर पडावे लागते. यामुळे उमेदवारांचे भवितव्य धोक्यात आले होते.

संतापलेल्या उमेदवारांनी परीक्षा केंद्रांबाहेर ठिय्या आंदोलन करत परीक्षा रद्द करून ती पुन्हा घेण्याची जोरदार मागणी केली होती. राजकीय नेते आणि सामाजिक कार्यकर्त्यांनीही या मागणीला पाठिंबा दिला होता.

उच्च न्यायालयाचा मोठा निर्णय

सुरुवातीला या तांत्रिक त्रुटींची तपासणी केली जाईल असे प्रशासनाने म्हटले होते. मात्र, उमेदवारांचा रोष आणि निष्पक्षतेचा विचार करता, अखेर उच्च न्यायालयाच्या कुलसचिवांनी अधिकृत अधिसूचना काढून १६ ऑगस्टची परीक्षा रद्द केल्याचे जाहीर केले.

नवी टायपिंग परीक्षा कधी आणि कुठे होणार, याबाबतची सविस्तर माहिती आणि वेळापत्रक लवकरच मुंबई उच्च न्यायालयाच्या अधिकृत संकेतस्थळावर प्रसिद्ध केले जाईल. त्यामुळे उमेदवारांनी अधिकृत अपडेट्ससाठी उच्च न्यायालयाच्या वेबसाईटवर लक्ष ठेवावे, असे आवाहन करण्यात आले आहे.