Narhari Zirwal : “आता विखुरलेलं राहून चालणार नाही”, दोन्ही NCP च्या विलीनीकरणाबाबत नरहरी झिरवळांचं वक्तव्य चर्चेत

उपमुख्यमंत्री अजित पवार यांच्या अपघाती निधनामुळे अनेकांच्या डोळ्याच्या कडा पाणावल्या आहेत, तर राज्यातील अनेक नेते ढसाढसा रडत आहेत. अजित पवार यांच्या निधनानंतर राष्ट्रवादीचे नेते तथा मंत्री नरहरी झिरवळ यांनी प्रतिक्रिया देत दु:ख व्यक्त केला. मात्र, यावेळी बोलताना मंत्री नरहरी झिरवळ यांनी केलेलं एक वक्तव्य चर्चेत आलं आहे.

‘आता वहिनींना (सुनेत्रा पवार यांना) मिनिस्ट्रीमध्ये आणावं’, असं म्हणत ‘आता विखुरलेलं राहून चालणार नाही’, असं सूचक भाष्य नरहरी झिरवळ यांनी दोन्ही राष्ट्रवादीच्या विलीनीकरणाबाबत केलं आहे. ते एबीपी माझा या वृत्तवाहिनीशी बोलत होते.

नरहरी झिरवळ काय म्हणाले?

अजित दादांचा पुढचा वारसा कोण चालवणार? या प्रश्नावर बोलताना नरहरी झिरवळ म्हणाले की, “आता सर्वांची मागणी अशीच आहे की वहिनींना (सुनेत्रा पवार यांना) कुठेतरी मिनिस्ट्रीमध्ये आणावं. अशी जनतेची प्रामाणिक इच्छा आहे. त्या प्रमाणे वरिष्ठांबरोबर चर्चा करून तसा निर्णय घेण्याची विनंती करू”, असं नरहरी झिरवळ यांनी म्हटलं आहे.

आता आणखी एक चर्चा आहे की महापालिका निवडणुकीच्या निमित्ताने दोन्ही राष्ट्रवादी पक्ष एकत्र आले. पवार कुटुंब देखील एकत्र आलं. मग दोन्ही राष्ट्रवादी एकत्र येण्याची ही वेळ आहे का? या प्रश्नावर बोलताना नरहरी झिरवळ म्हणाले की, “आता एकत्र आलेले आहेतच. त्यामुळे आणखी एकत्र येण्याला काय?”

दोन्ही राष्ट्रवादी पक्ष एकत्र येऊन सत्तेत सहभागी होतील का? असा प्रश्न विचारला. यावर बोलताना नरहरी झिरवळ म्हणाले की, “होईल, आपल्या संपूर्ण महाराष्ट्राची पूर्वीपासून तशी मागणी देखील होतीच. पण आता ही मागणी आणखी जोरकसपणे होईल. कारण आता असं विखुरलेलं राहून चालणार नाही. एकत्रच राहावं लागणार आहे, हे आपले विचार आहेत. तसेच सर्वसामान्यांचे देखील हेच विचार आहेत”, असं नरहरी झिरवळ यांनी म्हटलं आहे.