Nashik TCS Case Nida Khan Granted Bail: संपूर्ण देशाला हादरविणाऱ्या नाशिक येथील टीसीएस कंपनीतील लैंगिक शोषण, धर्मांतर आणि धार्मिक भावना दुखावणे या प्रकरणात आरोपी निदा खान हिला सोमवारी नाशिक न्यायालयाने जामीन मंजूर केला आहे. बार अॅण्ड बेंच यासंदर्भातील वृत्त दिलं आहे.
४२ दिवसांच्या शोधानंतर मे महिन्यात नाशिकमधील टीसीएस संलग्न बीपीओमधील धार्मिक धर्मांतर आणि लैंगिक छळ प्रकरणात निदा खानला अटक करण्यात आली होती. अटक झाल्यानंतर एका आठवड्याने तिने जामिनासाठी न्यायालयात धाव घेतली होती.
पोलिसांनी दिलेल्या माहितीनुसार, एका महिला सहकाऱ्याने निदा खानवर तिच्या धार्मिक भावना दुखावल्याचा आणि तिच्या धार्मिक विश्वासांवर प्रभाव टाकण्याचा प्रयत्न केल्याचा आरोप केला होता. तपासादरम्यान, विशेष तपास पथकाला असं आढळून आलं की, खानने तक्रारदार महिलेसोबत पुस्तके आणि व्हिडिओंसह इस्लामिक धार्मिक साहित्य शेअर केले होते. पोलीस खानच्या मलेशियातील संबंधांचीही चौकशी करत आहेत, कारण तिने तक्रारदाराला तिथे नोकरी मिळवून देण्याचं आश्वासन दिलं होतं.
नेमकं प्रकरण काय?
नाशिक येथील टाटा कन्सल्टन्सी सर्व्हिसेसशी संबंधित बीपीओ (BPO) युनिटमधील अनेक महिला कर्मचाऱ्यांनी सहकाऱ्यांवर आणि पर्यवेक्षकांवर लैंगिक छळ, लैंगिक शोषण आणि सक्तीने धर्मपरिवर्तन केल्याचे आरोप केले होते. या तक्रारींनंतर, नाशिक पोलिसांनी मार्च आणि एप्रिल २०२६ दरम्यान गुन्हा नोंदवला आणि या आरोपांची चौकशी करण्यासाठी एक विशेष तपास पथक (SIT) स्थापन केलं.
या प्रकरणात नाव असलेल्या आरोपींमध्ये निदा खान हिचा समावेश आहे. या प्रकरणातील कथित धर्मपरिवर्तनाच्या भागात तिची भूमिका असल्याचा आरोप तपासकर्त्यांनी केला आहे. अनेक आठवडे फरार राहिल्यानंतर तिला मे महिन्यात अटक करण्यात आली, त्यानंतर तिला न्यायालयात हजर करून न्यायिक कोठडीत पाठवण्यात आले.
गेल्या काही महिन्यांत या तपासामुळे अनेक आरोपींना अटक झाली आहे. तपासाचा भाग म्हणून पोलिसांनी अनेक कर्मचाऱ्यांची चौकशी केली असून, गोळा केलेले डिजिटल पुरावे, साक्षीदारांचे जबाब आणि इतर साहित्याची तपासणी सुरू ठेवली आहे. TCS ने यापूर्वीच या प्रकरणात नाव असलेल्या कर्मचाऱ्यांना निलंबित केले असून अंतर्गत चौकशी सुरू केली आहे. कंपनीने म्हटलं होतं की, ते गैरवर्तणुकीबाबत शून्य-सहिष्णुता (zero-tolerance) धोरण पाळतात आणि कायदा अंमलबजावणी अधिकाऱ्यांना पूर्ण सहकार्य करत आहेत.
