scorecardresearch

“तुम्हाला खरं सांगू का? माझ्या…”, राणा दांपत्याच्या भूमिकेवर सुप्रिया सुळेंची खोचक प्रतिक्रिया!

सुप्रिया सुळे म्हणतात, “नवनीत राणा दिल्लीत खूप अॅक्टिव्ह आहेत. खूप वेळा भाषण करतात. माझ्या दिल्लीतल्या सहकारी आहेत”

supriya sule on navneet rana
नवनीत राणा यांच्या भूमिकेवर सुप्रिया सुळेंची खोचक प्रतिक्रिया!

गेल्या काही दिवसांपासून राज्यात मशिदींवरील भोंगे आणि त्यासमोर लाऊडस्पीकरवर हनुमान चालीसा लावण्याबाबतची राज ठाकरेंची भूमिका यावरून राजकारण चांगलंच तापलं आहे. या नाट्याचाच पुढचा अंक आज महाराष्ट्रात दिसत असून अमरावतीमधील आमदार रवी राणा आणि खासदार नवनीत राणा यांनी मातोश्रीबाहेर हनुमान चालीसा पठण करण्यावर ठाम असल्याची भूमिका मांडली आहे. त्यावरून राजकीय वाद पेटला आहे. या पार्श्वभूमीवर राष्ट्रवादी काँग्रेसच्या खासदार सुप्रिया सुळे यांनी खोचक शब्दांत आपली प्रतिक्रिया दिली आहे.

“माझी सगळ्या गोष्टींवर श्रद्धा, पण…”

इस्लामपूरमध्ये कर्मवीर स्पर्धा परीक्षा प्रबोधिनीमध्ये यशवंतांचा सत्कार सोहळा आयोजित करण्यात आला होता. या सोहळ्यानंतर माध्यमांनी रवी राणा आणि नवनीत राणा यांनी हनुमान चालीसा पठणाबाबत घेतलेल्या भूमिकेवर विचारणा केली असता त्यावर सुप्रिया सुळेंनी “माझी सगळ्या गोष्टींवर श्रद्धा आहे, पण अंधश्रद्धा नाही”, अशी प्रतिक्रिया दिली.

“बाकीचे खासदार काय करतात…”

दरम्यान, यावर बोलताना इतर खासदारांच्या कामाचा फारसा अभ्यास नसल्याचं सुप्रिय सुळे म्हणाल्या. “तुम्हाला खरं सांगू? माझ्या मतदारसंघात मला इतकी कामं असतात, की मला बाकीचे खासदार काय करतात याचा फारसा अभ्यास नसतो. लोकसभा मतदारसंघ, त्याचा व्याप फार मोठा असतो”, असं त्या म्हणाल्या. दिल्लीतील नवनीत राणांच्या कार्यपद्धतीविषयी बोलताना त्या म्हणाल्या, “नवनीत राणा दिल्लीत खूप अॅक्टिव्ह आहेत. खूप वेळा भाषण करतात. माझ्या दिल्लीतल्या सहकारी आहेत”.

आज मातोश्रीबाहेर हनुमान चालीसा पठण करणार असल्याची घोषणा राणा दांपत्याने केली होती. या घोषणेपासूनच शिवसेना कार्यकर्ते आक्रमक झाले होते. त्यामुळे साकाळीच राणा यांच्या खार येथील निवासस्थानाबाहेर शिवसेना कार्यकर्त्यांनी आंदोलन सुरू केलं होतं. तसेच, तिथले बॅरिकेड्स तोडून शिवसेना कार्यकर्ते इमारतीमध्ये घुसल्याचं देखील समोर आलं होतं.

मराठीतील सर्व महाराष्ट्र ( Maharashtra ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Ncp mp supriya sule on navneet rana matoshree hanuman chalisa cm uddhav thackeray pmw

ताज्या बातम्या