‘दांडियामध्ये मुस्लिमांना प्रवेश नाही, हिंदूंना टिळा आवश्यक’, नवरात्रीसाठी विश्व हिंदू परिषदेची नियमावली

द इंडियन एक्सप्रेसने याबद्दल सविस्तर वृत्त दिले आहे. विश्व हिंदू परिषदेचे राष्ट्रीय प्रवक्ते आणि सहसचिव श्रीराज नायर यांनी माध्यमांशी बोलताना म्हटले, “नवरात्री उत्सवादरम्यान गरबा-दांडिया सारख्या कार्यक्रमात मुस्लिमांना प्रवेश द्यायचा नाही, असे आम्ही ठरवले आहे.” तसेच हिंदूंची ओळख पडताळण्यासाठी उपस्थितांची आधार तपासणी आणि कपाळावर टिळा लावण्याचे आवाहनही व्हिएचपीने केले आहे.

‘आम्ही कोणत्याही समुदायाच्या विरोधात नाही’

नायर पुढे म्हणाले, “नवरात्रीचा उत्सव हा फक्त नाच-गाण्यापुरता मर्यादित नाही. हा सण देवीच्या उपासनेचा आहे. मूर्तीपूजेच्या विरोधात असलेल्या मुस्लिमांनी या सणात का सहभागी व्हावे?” मुस्लिमांना नवरात्रीच्या कार्यक्रमांना उपस्थित राहू न देण्याचा निर्णय घेतला असला तरी विश्व हिंदू परिषद कोणत्याही समुदायाच्या विरोधात नाही, असेही नायर यांनी स्पष्ट केले.

धर्मांतर आणि गोहत्या विरोधातील मूळ उद्दिष्टांवर कोणतीही तडजोड केली जाणार नाही, असेही व्हिएचपीने जाहीर केले. “सण हे हिंदूंच्या सांस्कृतिक वारशाचा अविभाज्य भाग आहेत. त्याचे मूल्य किंवा महत्त्व आम्ही अजिबात कमी होऊ देणार नाही. हे निर्बंध खबरदारीचे उपाय म्हणून अवलंबत असून त्यातून मुस्लीम किंवा इतर कोणत्याही समुदायाला आमचा विरोध नाही”, असेही नायर यांनी स्पष्ट केले.

न्यूयॉर्कमध्ये मोहन भागवत काय म्हणाले होते?

आठवड्याभरापूर्वीच सरसंघचालक मोहन भागवत यांनी न्यूयॉर्कमध्ये सर्वधर्मीय धर्मगुरूंच्या परिषदेत बोलत असताना म्हटले की, भारतात एकही मुस्लीम नको, असे जर एखाद्या हिंदूला वाटत असले तर तो हिंदू नाही. जर तुम्ही स्वतःला हिंदू म्हणवून घेत असाल तर तुम्हाला मान्य करावे लागेल की सर्व मार्ग एकाच ध्येयाकडे नेतात. प्रत्येक माणसाला प्रतिष्ठा असून माणसांमध्ये कोणताही भेद नाही.

सरसंघचालक मोहन भागवत यांच्या विधानाबाबत व्हिएचपीच्या नायर यांचे लक्ष वेधले असता ते म्हणाले, आम्ही संघाच्या सरसंघचालकांच्या विधानावर भाष्य करणार नाही. आम्ही कोणाच्याही विरोधात नसून आमचाही सामाजिक सलोखा आणि शांततेवर विश्वास आहे. जर मुस्लीम आमच्या धार्मिक श्रद्धा आणि उपासना पद्धती मानत नाहीत. त्यांच्यासाठी आम्ही नियम शिथिल का करावेत? असाही सवाल त्यांनी उपस्थित केला.