छत्रपती संभाजीनगर या ठिकाणी असलेल्या आदर्श नगरी पतसंस्थेतील गैरव्यवहार प्रकरणी खासदार इम्तियाज जलील यांच्या नेतृत्त्वात निघालेल्या ठेवीदारांच्या मोर्चावर पोलिसांनी सौम्य लाठीमार केल्याची घटना घडली आहे. इम्तियाज जलील यांच्या नेतृत्वात निघालेल्या ठेवीदारांच्या मोर्चावर लाठीमाराची ही घटना डॉ. बाबासाहेब आंबेडकर पुतळ्यासमोर असलेल्या गेटवर घडली. नेमकं काय घडलं? एमआयएमचे खासदार इम्तियाज जलील यांच्या नेतृत्वाखाली छत्रपती संभाजीनगरात राज्य मंत्रिमंडळाच्या बैठकीवर आदर्श पतसंस्था ठेवीदारांनी मोर्चा काढला. हा मोर्चा पोलिसांनी अडवला आहे. हा मोर्चा विना परवागनगी काढण्यात आला असल्याचं पोलिसांनी म्हटलं आहे. सरकारने ठेवीदारांचे पैसे परत करावेत, आम्हाला मंत्र्यांना भेटू द्यावे अशी मागणी खासदार जलील यांनी केली. मात्र या मोर्चावर सौम्य लाठीमार केल्याची घटना घडली आहे. पोलिसांनी मोर्चाला सुरुवातीला स्पीकरवरुन काही सूचना दिल्या. मात्र मोर्चा सुरु होता. त्यानंतर जमावाला पांगवण्यासाठी पोलिसांना लाठीचार्ज करावा लागला. छत्रपती संभाजीनगरमध्ये कॅबिनेट बैठकीला सुरूवात झाली असून मराठवाड्याच्या विकासासाठी सरकारतर्फे मोठे निर्णय घेण्यात येण्याची शक्यता आहे. मुख्यमंत्री एकनाथ शिंदे, देवेंद्र फडणवीस, अजित पवार यांच्या उपस्थितीमध्ये ही बैठक पार पडत आहे. बैठकीच्या पार्श्वभूमीवर शहरात पोलिसांचा मोठा बंदोबस्त तैनात करण्यात आला आहे.
