लोकसत्ता प्रतिनिधी सांगली : सांगलीतील जुना बुधगाव रस्त्यावरील एका शेडवर अन्न व औषध प्रशासन विभागाच्या विशेष भरारी पथकाने छापा टाकून ४५ लाख २५ हजार रूपये किंमतीचा प्रतिबंधित पानमसाला व सुगंधित तंबाखूचा साठा जप्त केला असल्याची माहिती अन्न व औषध प्रशासन विभागाचे सहाय्यक आयुक्त (अन्न) नि. सु. मसारे यांनी गुरुवारु दिली. विशेष भरारी पथकास मिळालेल्या गुप्त माहितीच्या अनुषंगाने अन्न सुरक्षा अधिकारी श्री. स्वामी व श्री. पवार यांनी जुने बुधगाव रोड येथील अलताफ रमजान मुलाणी यांच्या शेडची तपासणी केली असता या ठिकाणी महाराष्ट्र शासनाने प्रतिबंधित केलेले पानमसाला व सुगंधित तंबाखू यांचा साठा आढळून आला. तसेच शेडच्या समोर उभ्या असलेल्या दोन वाहनांची तपासणी केली असता त्यामध्ये देखील पानमसाला व सुगंधित तंबाखू यांचा साठा आढळून आला. आणखी वाचा-सामान्य ग्राहकांना प्रीपेड स्मार्ट मीटर नाहीत, मविआच्या विरोधानंतर महावितरणचं एक पाऊल मागे अन्न व औषध प्रशासन, सांगलीच्या पथकाने या ठिकाणी कारवाई करून ४५ लाख २५ हजार ९६० रूपये किंमतीचा प्रतिबंधित अन्न पदार्थाचा साठा व दोन वाहने (किंमत ५ लाख ५० हजार रूपये) जप्त करुन ताब्यात घेवून शेड सीलबंद करण्यात आले. याप्रकरणी पुढील तपासाकरीता शहर पोलीस स्टेशन, सांगली येथे तक्रार दाखल करण्यात आली आहे.
