“मी तुम्हाला हात जोडून विनंती करतो, सर्वात आधी इन्स्टाग्राममधून बाहेर या”; राज ठाकरेचं पाडवा मेळाव्यात घणाघाती भाषण

माझी हात जोडून तुम्हाला विनंती आहे इन्स्टाग्रामधून बाहेर या

मी राजकारणात आलो जेव्हा पहिलं भाषण केलं, त्यावेळी मला बाळासाहेब ठाकरेंनी बोलवलं. एक एक वाक्य सांगितलं होतं ते स्क्रू फिट व्हावा तशी डोक्यात फिट झाली होती. बाळासाहेब ठाकरे म्हणाले होते की काय बोलतोस ते महत्त्वाचं नाही, तू आज त्यांना काय दिलंस ते महत्त्वाचं आहे. समोरच्यांना विचार करायला काय दिलंस? माझ्यावर दडपण असतं की नवीन काय देऊ तुम्हाला? हे सरकार विचार करायला लागेल. आज तुम्हाला, संपूर्ण देशाला करमणुकीत गुंतवून ठेवलं आहे. आयपीएल सुरु आहे. कुठले कुठले पिक्चर येत आहेत. मी आज तुम्हाला नम्र विनंती करणार आहे, पहिल्यांदा मोबाइलच्या इन्स्टाग्राममधून बाहेर या. मध्यंतरी रिलबाज वगैरे आले होते. गुंतायला होतं त्यात. डान्सबार झाले त्याची लक्षणं आहेत तिथे नोटा उधळणं बंद झालं इथे हे सुरु झालं. तु्म्हाला गुंतवून ठेवायचं आणि सरकारला प्रश्न विचारु नयेत यासाठीचं हे डिझाईन आहे. हे फक्त भारतात नाही जगभरात सुरु आहे असंही राज ठाकरे म्हणाले.

तुम्ही कुठल्याही गोष्टीसाठी रस्त्यावर येताच कामा नये हेच सरकारला वाटतं आहे-राज ठाकरे

तुम्ही कुठल्याही गोष्टीसाठी रस्त्यावर येताच कामा नये. तुम्ही असेच सडा आणि मरा असं सरकारला वाटतं आहे. तीनवेळा शेतकरी कर्जमाफी झाली तरीही सर्वाधिक आत्महत्या महाराष्ट्रात होत आहेत. रोज शेतकरी आत्महत्या होत आहेत कुणालाही काहीही पडलेलं नाही. कोस्टल रोडचं कौतुक मराठी माणूसच करतो आहे. पण हा रस्ता तुमच्यासाठी तयार झालेला नाही. तुम्हाला बाहेर काढण्यासाठी आणि इतरांना आत घेण्यासाठी हा रस्ता तयार झाला आहे. अदाणीसारखे उद्योजक सगळं घेत आहेत, सरकारचं लक्ष नाही. महाराष्ट्र म्हणून आपण आपली ओळख गमावून बसतो आहोत. मी अनेकदा काही व्हिडीओ पाहतो, आपलेच मराठी लोक ओरडून सांगत असतात हिंदी मत बोलो, तू काय करतोय? तू हे त्याला हिंदीतच सांगतो. तमिळनाडू, कर्नाटक बघा, गुजरात बघा असंही राज ठाकरे यांनी म्हटलं आहे. प्रत्येक राज्य आपली भाषा टिकवून आहे. आमच्याकडे आमदार हे कंत्राटदार, पैसे इतकंच बघत आहेत दुसरं काहीही चाललेलं नाही. देवेंद्र फडणवीस यांच्याकडे गृहखातं आहे, महाराष्ट्रात ड्रग्ज विकले जात आहेत असा आरोप राज ठाकरे यांनी केला.