आरे-वारे येथील समुद्रात बुडून तरुणाचा मृत्यू…एकाला वाचवण्यात यश

रविवारी हे कुटुंब आरे-वारे किनाऱ्यावर गेले असता, समुद्राच्या लाटा आणि विस्तीर्ण पाण्याचे आकर्षण पाहून कुटुंबातील संतोष शशिकांत भानुशाली आणि सुयोग राजेश भानुशाली हे दोघे तरुण पाण्यात उतरले. मात्र, भरती आणि लाटांच्या तीव्रतेचा अंदाज न आल्याने ते दोघेही खोल पाण्यात ओढले गेले.

दोघेही बुडत असल्याचे लक्षात येताच किनाऱ्यावर एकच गोंधळ उडाला. यावेळी स्थानिक ग्रामस्थ आणि आरे-वारे येथील पोलीस पाटील आदेश कदम यांनी प्रसंगावधान राखत तात्काळ समुद्रात उडी घेतली. त्यांनी जीवाची पर्वा न करता शर्थीचे प्रयत्न करून दोघांनाही बाहेर काढले.

दोघांनाही तत्काळ रुग्णवाहिकेतून जिल्हा रुग्णालयात हलवण्यात आले. मात्र, संतोष भानुशाली यांना उपचारापूर्वीच मृत घोषित करण्यात आले. सुयोग भानुशाली यांची प्रकृती सध्या स्थिर असून त्यांच्यावर उपचार सुरू आहेत.

दरम्यान, पावसाळा जवळ येत असल्याने समुद्रात उधाण आणि अनपेक्षित लाटांचे प्रमाण वाढले आहे. प्रशासनाकडून वारंवार सूचना देऊनही पर्यटकांकडून दुर्लक्ष होत असल्याचे दिसून येत आहे. या घटनेमुळे पर्यटकांच्या सुरक्षेचा प्रश्न पुन्हा ऐरणीवर आला आहे.

पर्यटकांनी अनोळखी समुद्रकिनाऱ्यावर पाण्यात उतरताना स्थानिकांचा सल्ला घ्यावा, तसेच भरती-ओहोटीच्या वेळांचे पालन करावे. समुद्राचा आनंद घेताना कोणताही धोका पत्करू नये, असे आवाहन प्रशासनाने केले आहे.