रत्नागिरी : रत्नागिरी जिल्ह्यात प्राणीसंग्रहालय स्थापनेसाठी महत्त्वपूर्ण विचार मांडत, सामान्य प्रशासन विभागाच्या अपर मुख्य सचिव आणि पालक सचिव सीमा व्यास यांनी जिल्ह्याच्या सौंदर्यात्मक विकासावर भर देण्याची सूचना केली. “रत्नागिरीच्या नैसर्गिक सौंदर्याला अधिकच उठाव देण्यासाठी स्मार्ट सिटी अंतर्गत विकास कामे अधिक आकर्षक असावीत,” असे त्यांचे मत होते.
रत्नागिरी जिल्ह्यातील १०० कोटींच्या आणि त्यापेक्षा जास्त मूल्य असलेल्या प्रकल्पांची आढावा बैठक जिल्हाधिकारी कार्यालयातील सभागृहात पार पडली. या बैठकीला जिल्हाधिकारी मनुज जिंदल, अपर जिल्हाधिकारी भाऊ गलांडे, निवासी उपजिल्हाधिकारी चंद्रकांत सूर्यवंशी, आणि प्रभारी जिल्हा नियोजन अधिकारी अमर पाटील यांच्यासह विभागप्रमुख उपस्थित होते.
श्रीमती व्यास म्हणाल्या, “मालगुंडमध्ये प्राणी संग्रहालय हा एक उत्कृष्ट प्रस्ताव आहे. या उपक्रमाची पाहणी करण्यासाठी काही अधिकाऱ्यांना मोठ्या प्राणी संग्रहालयांचा अभ्यास करण्यासाठी पाठवावा.” त्यांच्याशी जोडलेली सूचनाही अशी की, स्मार्ट सिटीच्या विकास कामांमध्ये संबंधित अधिकाऱ्यांनी अधिक प्रेरणादायी दृष्टिकोनातून काम केले पाहिजे. “या कामांमुळे रत्नागिरीचे नैसर्गिक सौंदर्य आणखी खुलून येईल,” असे त्यांचे मत होते.
त्यांनी एमएसआरडीसीच्या कामांची वेळेवर आणि नियोजित बजेटमध्ये पूर्तता करण्यावर जोर दिला. तसेच, जिल्ह्याच्या वैभवात भर घालणारी, नाविन्यपूर्ण उपक्रमांतर्गत वैशिष्ट्यपूर्ण कामे हवीत. शेतकऱ्यांकडून सुधारीत भात आणि नाचणी बियाणांच्या वितरणावर कृषी विभागाने तांत्रिक अहवाल तयार करावा, असेही त्यांनी निर्देश दिले.
संपूर्ण जिल्ह्याच्या विकासासाठी एकसंध कार्यवाही करण्याची आवश्यकता असल्याचे सांगताना, श्रीमती व्यास यांनी जिल्हाधिकाऱ्यांना सिंधुरत्न योजनेला मुदतवाढ मिळवण्यासाठी पाठपुरावा करण्याचे आदेश दिले.
