रत्नागिरी जिल्हा पोलीस दलाच्या श्वान पथकात ‘लिओ’ची दमदार एन्ट्री; बेल्जियन मालिनॉइसमुळे वाढणार गुन्हे अन्वेषणाची ताकद

बेल्जियन मालिनॉइस ही श्वानांची जात जगभरातील सुरक्षा आणि संरक्षण दलांमध्ये अत्यंत विश्वासार्ह मानली जाते. तीक्ष्ण बुद्धिमत्ता, अतिशय वेगवान हालचाल, आदेशांचे अचूक पालन आणि कठीण परिस्थितीत काम करण्याची क्षमता यामुळे या जातीचा वापर लष्कर, दहशतवादविरोधी पथके, बॉम्बशोधक पथके आणि पोलीस विभागात मोठ्या प्रमाणावर केला जातो. विशेष म्हणजे, रत्नागिरी जिल्हा पोलीस दलाच्या श्वान पथकात या जातीचा श्वान प्रथमच दाखल झाला आहे. त्यामुळे पोलीस दलाच्या तपास आणि शोधमोहीम क्षमतेत मोठी भर पडणार असल्याचे मानले जात आहे.

पोलीस प्रशासनाच्या माहितीनुसार, “लिओ”ला विशेष प्रशिक्षण देण्यात येणार असून तो गुन्हेगारांचा माग काढणे, संशयित वस्तू शोधणे, आपत्तीजनक परिस्थितीत मदत करणे आणि कायदा व सुव्यवस्था राखण्यासाठी विविध मोहिमांमध्ये सहभागी होणार आहे. गुन्हे अन्वेषणाच्या कामात श्वान पथकाची भूमिका अत्यंत महत्त्वाची मानली जाते. घटनास्थळी मिळालेल्या पुराव्यांचा वास घेऊन संशयितांपर्यंत पोहोचण्यात प्रशिक्षित श्वान मोठी मदत करतात. त्यामुळे “लिओ”च्या समावेशामुळे पोलीस दलाची कार्यक्षमता अधिक मजबूत होईल, असा विश्वास व्यक्त केला जात आहे.

नामकरण सोहळ्यावेळी पोलीस दलातील वरिष्ठ अधिकारी, श्वान पथकाचे प्रशिक्षक आणि कर्मचारी उपस्थित होते. कार्यक्रमात “लिओ”ची ओळख करून देण्यात आली तसेच त्याच्या प्रशिक्षण आणि भविष्यातील जबाबदाऱ्यांविषयी माहिती देण्यात आली. उपस्थितांनी या नव्या सदस्याचे टाळ्यांच्या गजरात स्वागत केले.

पोलीस अधीक्षक नितीन बगाटे यांनी यावेळी बोलताना सांगितले की, आधुनिक गुन्हेगारीचा मुकाबला करण्यासाठी तांत्रिक साधनांसोबत प्रशिक्षित श्वानांचे योगदानही तितकेच महत्त्वाचे आहे. श्वान पथक हे पोलीस दलाचे महत्त्वाचे अंग असून, अशा प्रशिक्षित श्वानांमुळे तपास प्रक्रिया अधिक जलद आणि प्रभावी बनते. “लिओ” भविष्यात अनेक महत्त्वाच्या मोहिमांमध्ये पोलीस प्रशासनाला मोलाची मदत करेल, असा विश्वास त्यांनी व्यक्त केला.

रत्नागिरी पोलिसांच्या ताफ्यात समाविष्ट झालेल्या “लिओ”चे सर्व स्तरांतून कौतुक होत असून, पोलीस दलातील हा नवा सदस्य आता नागरिकांमध्येही आकर्षणाचा विषय ठरत आहे.