रत्नागिरीत पोलिसांची धडक कारवाई; ६.८७ लाखांचा गुटखा-पान मसाला जप्त

पोलिसांना मिळालेल्या गोपनीय माहितीनुसार, कोल्हापूरहून एक इसम मोठ्या प्रमाणात प्रतिबंधित गुटखा व पान मसाला घेऊन रत्नागिरीत येणार होता. या माहितीच्या आधारे वरिष्ठ अधिकाऱ्यांच्या मार्गदर्शनाखाली सापळा रचण्यात आला.

पोलीस निरीक्षक विवेक पाटील यांच्या नेतृत्वाखालील पथकाने पहाटे संशयित वाहन अडवून तपासणी केली. त्यावेळी वाहनातून मोठ्या प्रमाणात गुटखा व पान मसाल्याचा साठा आढळून आला. या प्रकरणी शरद गणपती भंडारे (रा. सरूड, ता. शाहुवाडी, जि. कोल्हापूर) याला ताब्यात घेण्यात आले.

पोलिसांनी ३.२७ लाख रुपये किमतीचा गुटखा-पान मसाला तसेच ३.६० लाख रुपये किमतीचे वाहन असा एकूण ६.८७ लाखांचा मुद्देमाल जप्त केला आहे. याप्रकरणी रत्नागिरी शहर पोलीस ठाण्यात गुन्हा दाखल करण्यात आला असून पुढील तपास पोलीस उपनिरीक्षक सागर शिंदे करीत आहेत.