रत्नागिरी जिल्हा दुमदुमला शिमगोत्सवाच्या जल्लोषात! सणासाठी कोकणातील रिकामी घरे पुन्हा गजबजली

रत्नागिरी जिल्ह्यातील १८ पोलीस ठाण्यांच्या कार्यक्षेत्रात एकूण ३,७८६ ठिकाणी होलिका दहन करण्यात आले. यामध्ये १,२९४ सार्वजनिक होळ्या तर २,४९२ खासगी होळ्यांचा समावेश आहे.

Ratnagiri Shimotsav 2026 | कोकण शिमगोत्सव रत्नागिरी | Konkan Holi Palkhi Miravannuk | रत्नागिरी पालखी सोहळा

रत्नागिरी जिल्ह्यात पारंपरिक पद्धतीने साजरा होणारा शिमगोत्सव आणि सजलेली ग्रामदैवताची पालखी. (छायाचित्र: लोकसत्ता टीम)

रत्नागिरी: कोकणचा पारंपरिक आणि सांस्कृतिक वारसा जपणारा शिमगोत्सव सध्या रत्नागिरी जिल्ह्यात मोठ्या उत्साहात साजरा होत आहे. मुंबई-पुण्यासारख्या शहरांतून हजारो चाकरमानी गावाकडे परतल्याने संपूर्ण जिल्हा सणाच्या रंगात न्हाऊन निघाला आहे. कोकणातील रिकामी घरे ही आता गजबजली आहेत. तसेच मुंबई गोवा महामार्ग गाड्यांनी गजबजला असून काही ठिकाणी वाहतूक कोंडीही निर्माण झाली आहे.

जिल्ह्यात १८ पोलीस ठाण्यांच्या हद्दीत ३,७८६ होळ्या

रत्नागिरी जिल्ह्यातील १८ पोलीस ठाण्यांच्या कार्यक्षेत्रात एकूण ३,७८६ ठिकाणी होलिका दहन करण्यात आले. यामध्ये १,२९४ सार्वजनिक होळ्या तर २,४९२ खासगी होळ्यांचा समावेश आहे. ढोल-ताशांच्या गजरात आणि पारंपरिक जल्लोषात संपूर्ण जिल्हा दुमदुमून गेला आहे.

ग्रामदैवतांच्या १,१०० पालख्या; सांस्कृतिक वैभव खुलले

यावर्षी सुमारे १,१०० ठिकाणी ग्रामदैवतांच्या पालखी मिरवणुका निघत आहेत. सजवलेल्या पालख्या, पारंपरिक वेशातील तरुण-तरुणी, महिलांची फुगडी आणि लेझीम पथके यामुळे वातावरण भक्तिमय झाले आहे.

विशेषतः किनारपट्टी भागात शिमगोत्सवाला धार्मिक आणि सांस्कृतिक दृष्ट्या विशेष महत्त्व असून तेथे उत्साहाची लाट ओसंडून वाहत आहे. जिल्ह्यात साजरा होत असलेल्या या सणामध्ये शंखासूर आकर्षणाचा केंद्र बिंदू ठरला आहे.

हेही वाचा

कोकणात शिमगोत्सवाची धूम; होलिकोत्सवाचा उत्साह टीपेला

जिल्ह्यातील तालुका निहाय होलिका दहना मध्ये दापोलीत ६०० (१५० सार्वजनिक, ४५० खासगी), खेड ३१०, गुहागर ३०८, चिपळूण २७४, संगमेश्वर २६७, राजापूर २४६, देवरुख २२६, मंडणगड २२५, लांजा २१०, रत्नागिरी ग्रामीण २११ तसेच रत्नागिरी शहरात ११६ ठिकाणी होलिका दहन करण्यात आले. याशिवाय पूर्णगड, जयगड, दाभोळ, बाणकोट, सावर्डे, अलोरे-शिरगाव आणि नाटे येथेही मोठ्या संख्येने होलिका दहन होणार आहे.

जिल्हा प्रशासन सज्ज; कडेकोट बंदोबस्त

शिमगोत्सव काळात कायदा व सुव्यवस्था अबाधित ठेवण्यासाठी जिल्हा पोलीस प्रशासनाने १८ पोलीस ठाण्यांत अतिरिक्त बंदोबस्त देण्यात आला. तसेच संवेदनशील भागांत सीसीटीव्हीची देखरेख ठेवण्यात आली.

वाढते प्रदूषण लक्षात घेऊन प्रशासनाने झाडांची कत्तल टाळून सुकलेल्या लाकडांचा वापर करण्याच्या सूचना केल्या आहेत. प्लास्टिक व रासायनिक पदार्थ जाळण्यास सक्त मनाई करण्यात आली आहे. अनेक गावांनी ‘पर्यावरणपूरक होळी’चा संकल्प करण्यात आला.

कोकणातील बाजारपेठांत उलाढाल वाढली

मुंबई-पुण्यातील चाकरमानी गावाकडे परतल्याने रत्नागिरीतील बाजारपेठा फुलल्या आहेत. पूजेचे साहित्य, किराणा आणि फुलांच्या दुकानांमध्ये ग्राहकांची मोठी गर्दी दिसून येत आहे. बाजार पेठा लोकांनी गजबजून गेल्या असल्याने दुकानदारां मध्ये उत्साहाचे वातावरण निर्माण झाले आहे.