विश्वास पाटील यांनी माफी मागावी अन्यथा गनिमी काव्याने आंदोलन, संभाजी ब्रिगेडचा इशारा

अन्यथा गनिमी काव्याने संपूर्ण महाराष्ट्रात संभाजी ब्रिगेड स्टाईलने आंदोलन अधिक तीव्र करण्याचा इशाराही देण्यात आला आहे. ज्या पद्धतीने जेम्स लेन ने छत्रपती संभाजी महाराजांची बदनामी केली त्याच पद्धतीने विश्वास पाटील यांनी केली आहे. इतिहासकार विश्वास पाटील हे जेम्स लेन यांचे मावस भाऊ आहेत का? असा सवाल उपस्थित करत संभाजी ब्रिगेडने त्यांच्या हेतूंवर संशय व्यक्त केला आहे. पाटील यांनी संभाजी महाराजांच्या प्रतिमेला धक्का पोहोचवण्याचा प्रयत्न केला असून यामुळे महाराष्ट्राची बदनामी होत असल्याचा आरोप ब्रिगेडने केला आहे.

या मागण्यांबाबत संभाजी ब्रिगेडच्या वतीने जिल्हाधिकारी यांना निवेदन देण्यात आले असून, सार्वजनिक बांधकाम मंत्री व संमेलनाचे स्वागताध्यक्ष शिवेंद्रसिंहराजे भोसले यांच्याशीही यासंदर्भात चर्चा झाल्याची माहिती ब्रिगेडच्या पदाधिकाऱ्यांनी दिली. दरम्यान, या निषेधार्थ सातारा शहरातील पोवई नाका येथील शिवतीर्थावर संभाजी ब्रिगेडच्या वतीने आंदोलन करण्यात आले.यावेळी विश्वास पाटील यांच्या विरोधात जोरदार घोषणाबाजी करण्यात आली.मागण्या मान्य न झाल्यास पुढील टप्प्यात आंदोलन तीव्र करण्याचा इशारा देण्यात आला आहे.

विश्वास पाटील यांनी तात्काळ जाहीर माफी मागावी आणि कादंबरीतील आक्षेपार्ह मजकुरात दुरुस्ती करावी, अन्यथा साहित्य संमेलन उधळून लावले जाईल, असा थेट इशारा संभाजी ब्रिगेडच्या वतीने देण्यात आला आहे.