“..तर मी स्वतःहून पक्षातून बाजूला होईन”, नाराजीच्या चर्चांबाबत प्रश्न विचारताच संदीप देशपांडेचं उत्तर

संदीप देशपांडे काय म्हणाले?

संतोष धुरीने पक्ष सोडल्यानंतर माझ्याशी चर्चा झाली नाही. जाहीरनामा-वचननामा करताना मला विश्वासात घेतलं नाही. मला जेव्हा एखादी जबाबदारी दिली जाते, तेव्हा मलाच का? असं विचारत नाही. जर मला जबाबदारी दिली नाही तर मी प्रश्न विचारु शकत नाही. राज ठाकरेंना वाटलं असेल की संदीप या गोष्टीसाठी फिट नाही, अमुक एक व्यक्ती चांगल्या प्रकारे चर्चा करु शकतो असं त्यांना वाटलं असेल. शिवाय सगळंच मला येतं असा माझा फाजील आत्मविश्वास नाही. माझ्यापेक्षा काही गोष्टी बाळा नांदगावकर, सरदेसाई चांगल्या करु शकतात. मी आक्रमक आहे, त्यामुळे गोष्टी बिघडू शकतात असंही त्यांना वाटलं असेल. मी त्या गोष्टी नीट हाताळू शकेन असं त्यांना (राज ठाकरे) वाटलं नसेल तर ठीक आहे. माझी काहीही तक्रार नाही. त्यात राग येण्यासारखं काही नाही असं संदीप देशपांडेंनी म्हटलं आहे. महाराष्ट्र टाइम्स ऑनलाइनला दिलेल्या मुलाखतीत संदीप देशपांडेंनी हे वक्तव्य केलं आहे.

नाराजीच्या चर्चांवर संदीप देशपांडे काय म्हणाले?

संतोष धुरीने त्याचा निर्णय घेतला तो चुकीचा की बरोबर हे मी सांगणार नाही. त्याला जे योग्य वाटलं ते त्याने केलं. उद्या जर मला असं वाटलं की माझ्या पक्षात अॅसेट नाही तर लायबेलिटी आहे तर मी स्वतःहून बाजूला होईन. माझा अट्टाहास असणार नाही की लायबेलिटी झालो तरीही मला पोसा, माझ्या पक्षात मी अॅसेट असेन तरच मी काम केलं पाहिजे. लायबेलिटी झालो तर मी काम नाही केलं पाहिजे. एखादा खेळाडूचा क्रिकेटमध्ये बॅटला बॉल लागत नाही, त्याला नीट खेळता येत नाही तर तो लायबेलिटी होतो, त्याने बाजूला झालं पाहिजे. मी कधी अॅसेट आहे आणि कधी लायबेलिटी हे मला देवाच्या दयेने कळेल आणि तेव्हा मी निश्चितपणे बाजूला होईन. एखाद्या पक्षात अॅसेट असणं गर्वाची गोष्ट आहे. आपल्यामुळे पक्षाला अडचण होते तर मग तुम्ही पक्षासाठी ओझं होता. अजूनपर्यंत माझ्यावर ही वेळ आलेली नाही, देव करो ती वेळ न येवो, पण जर वेळ आलीच तर काय निर्णय घ्यायचा मी घेईन, असं संदीप देशपांडेंनी म्हटलं आहे.