संगमनेरमधील ठेकेदारांना काळ्यायादीत टाकण्याचा आमदार अमोल खताळ यांचा इशारा

सार्वजनिक बांधकाम विभागाच्या आढावा बैठकीत ते बोलत होते. यावेळी विभागाचे कार्यकारी अभियंता श्रीनिवास वर्पे, उपविभागीय अभियंता काशिनाथ गुंजाळ, संगमनेर पंचायत समितीचे गटविकास अधिकारी प्रशांत सिनारे, पंचायत समितीचे उपविभागीय अभियंता हेमंत चव्हाण यांच्यासह दोन्ही विभागांचे उपअभियंते उपस्थित होते.

याप्रसंगी बोलताना आमदार खताळ म्हणाले, काही ठेकेदारांनी स्वतःची मक्तेदारी निर्माण करून एकाच वेळी चार-पाच कामे स्वतःकडे ठेवली होती. मात्र, ही कामे दर्जाहीन झाल्यामुळे संगमनेरमध्ये वारंवार रस्त्यांच्या समस्या निर्माण होत आहेत. अशी चुकीची कामे यापुढे सहन केली जाणार नाहीत. नाशिक येथे होणाऱ्या कुंभमेळ्याच्या पार्श्वभूमीवर शिर्डी विमानतळाकडे जाणारा निळवंडे–जांभुळवाडी फाटा, वडगावपान फाटा, तळेगाव, संगमनेर अकोले रस्ता, शहरातील जीवन विमा महामंडळ (एलआयसी) इमारतीजवळील रस्ता तसेच तालुक्यातील इतर अनेक रस्त्यांवर पावसामुळे मोठमोठे खड्डे पडले असून रस्त्यांची अत्यंत दुरवस्था झाली आहे. या रस्त्यांवरून वाहनचालकांना प्रवास करताना मोठी कसरत करावी लागत आहे.

महायुती सरकारच्या माध्यमातून या सर्व रस्त्यांसाठी निधी उपलब्ध करून देण्यात आलेला आहे. मात्र, ठेकेदारांकडून वेळेवर कामे पूर्ण केली जात नाहीत. त्यामुळे अपूर्ण असलेल्या सर्व रस्त्यांची कामे लवकरात लवकर आणि दर्जेदार पद्धतीने पूर्ण करून घ्यावीत, अशा स्पष्ट सूचना त्यांनी अधिकाऱ्यांना दिल्या. या बैठकीत कामे करताना येणाऱ्या अडचणींबाबत सविस्तर चर्चा करत त्यातून कशा पद्धतीने मार्ग काढायचा याचीही चर्चा झाली. आमदार खताळ यांनी ठेकेदारांविरुद्ध घेतलेल्या आक्रमक भूमिकेमुळे संगमनेरमध्ये राजकीय वादाची चर्चा सुरू होण्याची शक्यता व्यक्त केली जाते.

अहवाल द्या

जे ठेकेदार दर्जेदार काम करत नाहीत, त्यांचा सविस्तर अहवाल तयार करण्यात यावा. तसेच ज्या ठेकेदारांच्या रकमा शासनाकडे जमा आहेत, त्या कामांच्या नव्याने निविदा काढून रस्त्यांची कामे लवकरात लवकर आणि दर्जेदार पद्धतीने पूर्ण करण्यात यावीत. ज्या ठिकाणी अडचणी येतील, त्या ठिकाणी लोकप्रतिनिधी म्हणून मी तुमच्या पाठीशी खंबीरपणे उभा राहीन. — आमदार अमोल खताळ