सांगलीत दलित महासंघाच्या पदाधिकाऱ्याचा खून; धारदार शस्त्र लागल्याने एका हल्लेखोराचाही मृत्यू

याबाबत पोलीस निरीक्षक अरूण सुगावकर यांनी दिलेल्या माहितीनुसार दलित महासंघाचा अध्यक्ष उत्तम जिन्नाप्पा मोहिते (वय ३८, रा. गारपीर चौक, सांगली) यांचा काल वाढदिवस साजरा करण्यात आला. यानिमित्त त्याच्या घरासमोर व्यासपीठही उभारण्यात आले होते. वाढदिवसाच्या शुभेच्छा देण्यासाठी आलेल्या गणेश मोरे याच्याशी त्यांचा वाद झाला. यावेळी पुतण्या योगेश मोहिते याने समजूत घालून मोरे याला परत पाठवले. यानंतर मध्यरात्री उशीरा मोरे हा त्याच्या अन्य सहकाऱ्यांसह हत्यारे घेऊन आला. तो येताना दिसताच मोहिते यांनी घरी लपण्याचा प्रयत्न केला. मात्र हल्लेखोरांनी त्यांना गाठत त्याच्यावर चाकू, धारदार हत्यार, लोखंडी कांबी यांनी वार करण्यात आले. या हल्ल्यात मोहिते रक्ताच्या थारोळ्यात पडले. हल्ला थोपविण्याचा प्रयत्न करत असलेल्या योगेश मोहितेवरही यावेळी वार करत त्यांना जखमी करण्यात आले. हल्ल्यानंतर मोहितेंना गंभीर जखमी अवस्थेत रुग्णालयात दाखल करण्यात आले. मात्र, उपचार सुरू होण्यापूर्वीच त्यांचा मृत्यू झाला.

हल्ल्यादरम्यान हा हल्ला होत असताना शाहरूख रफिक शेख या हल्लेखारास त्यांच्यातील एका हल्लेखारोकडील धारधार शस्त्राचा वार बसला. यात तो गंभीर जखमी झाला. त्याला शासकीय रुग्णालयात उपचारासाठी नेण्यात आले. उपचार सुरू असताना त्याचाही आज पहाटे मृत्यू झाला.मोहिते यांच्या खूनप्रकरणी पत्नी ज्योती मोहिते यांच्या तक्रारीवरून संशयित आठ जणांविरुद्ध सांगली शहर पोलीस ठाण्यात गुन्हा दाखल करण्यात आला आहे. हल्लेखोरांपैकी काही जणांची पोलीस दप्तरी गुन्हेगार म्हणून नोंद आहे. तर मृत मोहिते यांच्याविरुद्धही पोलीस ठाण्यात सरकारी कामात अडथळा आणणे, बलात्कार, विनयभंग, मारामारी असे नऊ गुन्हे दाखल असल्याचे पोलीस सूत्रांकडून सांगण्यात आले.

या घटनेचे चित्रीकरण मोहिते यांच्या घरातील कॅमेरामध्ये उपलब्ध असून, त्या आधारे तपासाची दिशा निश्चित करून हल्लेखोरांचा शोध घेण्यात येत असल्याचे पोलीस अधीक्षक संदीप घुगे यांनी सांगितले. या हल्ल्यामागे पूर्वीचा वाद असल्याची शक्यता त्यांनी वर्तवली असली तरी निश्चित माहिती हल्लेखोरांना ताब्यात घेतल्यानंतरच समोर येईल, असेही त्यांनी सांगितले.