सांगली महापालिकेत स्वीकृत सदस्य निवडीसाठी राजकीय हालचाली गतिमान

महापालिका सभागृहात सदस्यांची संख्या  ७८ असून सदस्य संख्येनुसार ८ जणांची स्वीकृत सदस्य म्हणून नियुक्ती करण्यात येणार आहे. यासाठी महापौर धीरज सुर्यवंशी यांच्या अध्यक्षतेखाली दि. १७ एप्रिल रोजी विशेष सभा बोलावण्यात आली आहे. सदस्य संख्येच्या प्रमाणात आठ पैकी ४ सदस्य भाजपचे तर राष्ट्रवादी काँग्रेस अजित पवार गट आणि काँग्रेसचे प्रत्येकी २ असे आठ स्वीकृत सदस्य निवडण्यात येणार आहेत. विशेष सभेत सभागृह नेते संबंधित सदस्यांचे नाव  महापौरांना सादर करतील, यानंतर महापौर या सदस्यांचे नाव जाहीर करतील. महापौर, उपमहापौर निवडीनंतर स्थायी समितीसह  विविध समिती सभापती निवडीनंतर स्वीकृत सदस्य निवडीचा कार्यक्रम जाहीर करण्यात आला आहे.

महापालिका निवडणुकीत बंडखोरी टाळण्यासाठी उमेदवारी दाखल केलेल्या अनेक कार्यकर्त्यांनी स्वीकृत करण्याचा शब्द देत निवडणुक मैदानातून उमेदवारी मागे घेण्यास विनंती केली होती.यानुसार नेत्यांच्या शब्दावर विश्‍वास ठेवून अनेक कार्यकर्त्यांनी उमेदवारी मागे घेतली होती. यामुळे आता हे कार्यकर्ते स्वीकृतसाठी दिलेला शब्द पाळावा यासाठी नेत्यांकडे आग्रह धरत आहेत. तर काही मातब्बर कार्यकर्त्यांचा निवडणुकीत पराभव झाला. अशी मंडळीही स्वीकृतसाठी प्रयत्नशील आहेत. भाजपने पराभूत उमेदवारांना स्वीकृतची संधी मिळणार नाही असे धोरण असल्याचे जाहीर केले असले तरी अपवाद करण्याची विनंती केली जात आहे. इच्छुकांची संख्या अधिक असल्याने स्वीकृत सदस्यत्वाची संधी केवळ एक वर्षासाठीच असेही धोरण अवलंबले जाण्याची चिन्हे आहेत.

भाजपकडून स्वीकृतसाठी शेखर इनामदार, पांडूरंग कोरे, विश्‍वजित पाटील,  केदार खाडिलकर, शीतल लोंढे, राहूल बोळाज, बाबासाहेब आळतेकर आदी नावे चर्चेत असून काँग्रेसकडून अमित शहा, प्रताप चव्हाण, चंद्रकांत हुलवान तर राष्ट्रवादी अजित पवार गटाकडून सचिन सावंत, जयंत जाधव, राधिका हारगे, जावीद मोमीन, सतीश कांबळे, जमील बागवान आदी नावे चर्चेत आहेत.