कट्टर हिंदुत्व हे मी स्वीकारलेले कर्तव्य – आमदार संग्राम जगताप; उपमुख्यमंत्री अजित पवार यांच्या सल्ल्यानंतरही भूमिकेवर ठाम

ठाकरे गटाचे काही माजी नगरसेवकांनी शिवसेनेच्या शिंदे गटात प्रवेश केला. ठाकरे गटाच्या या माजी नगरसेवकांनी विधानसभा निवडणुकीत आमदार जगताप यांच्या विरोधात प्रचार केला होता. आता ठाकरे गट हेच माजी नगरसेवक महायुतीत सहभागी झाले आहेत. या संदर्भात भूमिका मांडताना आमदार जगताप म्हणाले, निवडणुकीला अद्याप अवकाश आहे. ज्यावेळी निवडणूक जवळ येईल, त्यावेळी यासंदर्भात विचार करू. कोणी काम केले, कोणी नाही केले यापेक्षा पक्षाची विचारधारा महत्त्वाची आहे. काहीजण निवडणुकीत वेगवेगळी भूमिका घेत असतात त्याचबरोबर नंतर पक्षाची भूमिका प्रत्यक्षात वेगळी असते.

पक्षाच्या विचारधारेपेक्षा कट्टर हिंदुत्वाची वेगळी भूमिका स्वीकारल्याच्या पार्श्वभूमीवर, पक्षाचे प्रमुख तथा उपमुख्यमंत्री अजित पवार यांनी आमदार जगताप यांना सल्ला दिला होता. याकडे लक्ष वेधले असता आमदार जगताप म्हणाले, पक्षाच्या भूमिकेसंदर्भात मतदारसंघातील मतदारांनी माझ्यावर जबाबदारी दिली, निवडून दिले. ते मी पार पाडतोच आहे. परंतु हिंदुत्व हे माझे कर्तव्य आहे, तेही मी पार पाडतो आहे. मतदारांनी टाकलेली जबाबदारी आणि मी स्वीकारलेले कर्तव्य दोन्ही मला पार पाडायचे आहे.

शहर मतदारसंघातील मतदार यादीत अनेक बांगलादेशींची नावे आहेत. अनेक बांगलादेशी नगरमध्ये आढळले आहेत. त्यांच्याविरुद्ध गुन्हे दाखल झालेले आहेत, अटकही झाली आहे. परंतु, मुळापाशी जाऊन पोलिसांनी तपास केला नाही. मतदार यादीत त्यांची नावे आहेत. सध्याच्या परिस्थितीत त्याचा सोक्षमोक्ष लावला पाहिजे. जी मतदार यादी लोकसभा निवडणूक वेळी होती, तीच विधानसभेच्या निवडणूक वेळेलाही होती. परंतु, पराभूत झाले की मतदार यादी आणि मतदान यंत्र याला दोष दिला जातो, अशी टीकाही आमदार जगताप यांनी केली.