गेल्या वर्षी एकनाथ शिंदे यांनी केलेल्या बंडानंतर शिवसेनेत उभी फुट पडली. त्यानंतर शिवसेना ( ठाकरे गट ) आणि शिंदे गटातील नेत्यांमध्ये सातत्याने शाब्दीक चकमक होत असते. ठाकरे गटाच्या उपनेत्या सुषमा अंधारे यांनी आमदार संजय शिरसाट यांच्यावर विनयभंगाची तक्रार दाखल केली होती. पण, याप्रकरणात शिरसाट यांना पोलिसांनी क्लीनचीट दिली असल्याचं सांगितलं जात आहे. छत्रपती संभाजीनगर येथे झालेल्या एका कार्यक्रमात बोलताना संजय शिरसाट यांनी सुषमा अंधारेंबद्दल एक विधान केलं होतं. त्याविरोधात सुषमा अंधारेंनी परळी पोलीस ठाण्यात तक्रार दाखल केली होती. मात्र, प्रकरण संभाजीनगर येथे घडल्याने परळी पोलिसांनी ते वर्ग केलं होतं. पोलीस तपासानंतर आता संजय शिरसाट यांना क्लीनचिट मिळाली असल्याचं वृत्त समोर येत आहे. हेही वाचा : “खरी शिवसेना शिंदेंची, ठाकरे गट कोणता वर्धापन दिन साजरा करणार?” भाजपाच्या प्रश्नावर संजय राऊतांचं प्रत्युत्तर; म्हणाले… यावर संजय शिरसाट यांनी प्रतिक्रिया दिली आहे. ते 'टीव्ही ९ मराठी'शी बोलत होते. "काही लोकांना प्रसिद्धीची हाव आहे. कोणत्याही प्रकारे त्यांना प्रसिद्धी हवी आहे. अश्लील बोललं असेल, तर राजकारण सोडून देतो, असं आव्हान दिलं होतं. पण, लावलेले आरोप सहन करणार नाही. आज पोलिसांनी क्लीनचिट दिली आहे," असं संजय शिरसाटांनी सांगितलं. हेही वाचा : सावित्रीबाई फुले यांच्याविषयी आक्षेपार्ह लिखाण, ‘इंडिक टेल्स’ वेबसाईटवर कारवाईचे मुख्यमंत्र्यांचे निर्देश; म्हणाले… "पोलिसांच्या क्लीनचिटवर किती विश्वास बसतो, माहिती नाही. यावरही ते राजकारण करतील. मात्र, लढाई लढावी लागते. त्यामुळे या कलाकाराने केलेल्या आरोपांवर न्यायालयीन लढाई सुरु आहे. तीही लढणार आहे," असं शिरसाट यांनी स्पष्ट केलं.
