कराड : कोयना शिवसागरात यंदाच्या एक जून या जलवर्षाच्या प्रारंभापासून गेल्या तीन महिन्यात १४१.०६ अब्ज घनफूट /टीएमसी (१३४.०२ टक्के) जल आवक, तर कोयना पाणलोटात ५,५१७.६६ घनफूट /क्युसेक वार्षिक सरासरीच्या ११०.३६ टक्के पावसाची नोंद झाली आहे. पावसाचा बराच कालावधी शिल्लक असल्याने सरासरी पाऊस आणखी वाढणार आहे.
कोयना पाणलोटक्षेत्रातील पावसाची मुसळधार गेल्या चार- पाच दिवसात अगदीच ओसरल्याने धरणातून कोयना नदीपात्रात होणारा जलविसर्ग पूर्णतः बंद होताना, दुथडी वाहणाऱ्या कोयना, कृष्णा, वारणा आणि पंचगंगा नद्या पात्रातून वाहू लागल्या आहेत.
याखेपेस पावसाळ्याला वेळेत सुरुवात होऊन सलग तीन महिने पावसाची कामगिरी उत्तम राहिली आहे. १०५.२५ अब्ज घनफूट क्षमता असलेल्या कोयना शिवसागराचा जलसाठा आज रविवारी सायंकाळी पाच वाजता १०३.९५ अब्ज घनफूट (९८.७६ टक्के) असून, गतवर्षीच्या तुलनेत तो १७.७३ अब्ज घनफुटाने अधिकचा राहिला आहे. सध्या धरणात प्रतिसेकंद ५,८६१ घनफूट पाण्याची आवक सुरू आहे.
कोयना धरणाच्या १ जून या तांत्रिक वर्षाच्या सुरुवातीपासून यंदा आजवर कोयनेच्या सहा वक्री दरवाजातून आजवर विनावापर ३८.५३ अब्ज घनफूट पाणी (धरण क्षमतेच्या ३६.६० टक्के) कोयना नदीत सोडण्यात आले. तर, पायथा वीजगृहातील वीज निर्मितीसाठी ३.४४ अब्ज घनफूट पाण्याचा वापर झाला आहे. सिंचनासाठी १,१६ अब्ज घनफूट, तर पश्चिमेकडील वीज निर्मितीसाठी १०.५९ अब्ज घनफूट पाण्याचा वापर झाला आहे. एकूणच कोयनेचा पाणीसाठा, त्यातून वीजनिर्मिती आणि पाणलोटातील पर्जन्यमान समाधानकारक राहिल्याने कृष्णा- कोयना नद्यांकाठची वर्षभराच्या पाण्याची चिंता मिटली आहे.
