“चार महिने द्या, मला राज्य सरकार बदलायचंय”, शेतकऱ्यांसमोर शरद पवारांनी ठोकला शड्डू, म्हणाले…

उद्धव ठाकरे आणि शरद पवार यांनी त्यांच्या पक्षातील नेते, पदाधिकारी आणि कार्यकर्त्यांना विधानसभा निवडणुकीच्या तयारीला लागण्याचे आदेश दिले आहेत. शरद पवारांनी तर आत्तापासूनच दौऱ्यांना सुरुवात केली आहे. पवारांनी वेगवेगळ्या गावांमधील शेतकरी आणि ग्रामस्थांच्या भेटीगाठी सुरू केल्या आहेत. दरम्यान, इंदापूर दौऱ्यावेळी शरद पवार यांनी शेतकरी आणि ग्रामस्थांशी संवाद साधला. यावेळी पवार ग्रामस्थांना म्हणाले, “चार-सहा महिने थांबा, मला राज्यातलं सरकार बदलायचं आहे. शेतकऱ्यांचे प्रश्न सोडवण्यासाठी सर्वांना रस्त्यावर उतरावं लागेल.”

शरद पवार यांनी आज पुरंदर तालुक्याच्या कोळविहिरे येथे दुष्काळग्रस्त शेतकऱ्यांशी संवाद साधला. यावेळी ते म्हणाले, तुम्ही चार-सहा महिने थांबा, मला राज्य सरकार बदलायचं आहे. हे सरकार बदलल्याशिवाय आपल्याला शेतकऱ्यांसाठी हवी तशी धोरणं राबवता येत नाहीत. सरकार बदलल्यावर आपण शेतकऱ्यांसाठी कामं करू.

शरद पवारांचे दौरे सुरू

शरद पवार म्हणाले, गेले पाच-सहा दिवस राज्यातल्या काही भागांमध्ये एक वेगळं चित्र दिसत होतं. राज्य सरकारनेसुद्धा काही गावं, काही तालुके हे दुष्काळी म्हणून जाहीर केलेले आहेत आणि साधारणत: त्याच्यामध्ये ज्यांचा उल्लेख होता, त्यामध्ये पुणे जिल्ह्यातील पुरंदर तालुका हा अग्रभागी होता. तेव्हाच मी ठरवलं एखादा दिवस काढायचा आणि काही गावांना जाऊन भेटी द्यायच्या व येणाऱ्या संकटांपासून लोकांची सुटका करण्यासाठी तातडीने काय उपाययोजना करायची? आणि दुसऱ्या बाजूने कायमचा प्रश्न सोडवण्यासाठी दीर्घ स्वरूपाचे काय कार्यक्रम हातामध्ये घेता येतील? त्याची माहिती लोकांकडून घ्यायची आणि त्याच दृष्टीने मी या ठिकाणी आलो.

हे ही वाचा >> “मोहन भागवत एक वर्षानंतर बोलले, हेही काही कमी नाही”, उद्धव ठाकरेंचा सरसंघचालकांना टोला!

राष्ट्रवादीचे सर्वेसर्वा म्हणाले, गेल्या दोन-तीन दिवसात वातावरण पूर्णपणे बदललं आहे, पण समाधानकारक नाही. पीकं येतील, अशी स्थिती नाही, चाऱ्याचा प्रश्न सुटला आहे अशी स्थिती या ठिकाणी नाही आणि तुमच्याकडून माहिती घेणे आणि राज्य सरकारशी बोलून मुख्यमंत्री व त्यांच्या सहकाऱ्यांची एक संयुक्त बैठक घेऊन या प्रश्नांची सोडवणूक करण्याची जबाबदारी घ्यावी हा आजच्या भेटीचा माझा उद्देश होता.