कर्जमुक्ती योजनेतील पात्र शेतकऱ्यांच्या याद्या प्रसिद्ध होणार

कर्जमुक्ती योजनेच्या लाभासाठी पात्र शेतकर्‍यांनी बायोमेट्रिक (अंगठा) आधार प्रमाणीकरण करणे तसेच ॲग्रीस्टॅक पोर्टलवर नोंदणी करून फार्मर आयडी तयार करणे अनिवार्य असल्याचे आवाहन जिल्हा उपनिबंधक मंगेश सुरवसे यांनी केले आहे.

नैसर्गिक आपत्ती, अनियमित पाऊस, अतिवृष्टी, दुष्काळ, गारपीट आदी कारणांमुळे पीक कर्जाची वेळेत परतफेड करू न शकलेल्या थकबाकीदार शेतकर्‍यांना नव्याने पीक कर्ज उपलब्ध होण्यात अडचणी निर्माण होतात. ही बाब लक्षात घेऊन राज्य मंत्रिमंडळाने 2 जूनच्या बैठकीत या योजनेस मान्यता दिली. योजनेअंतर्गत दि. १ एप्रिल २०१९ ते ३१ मार्च २०२५ या कालावधीत घेतलेल्या अल्पमुदत पीक कर्जांपैकी दि. ३० सप्टेंबर २०२५ रोजी थकबाकी असलेली आणि ३१ मार्च २०२६ पर्यंत परतफेड न झालेली कर्जे विचारात घेतली जाणार आहेत.

पात्र शेतकर्‍यांना प्रति शेतकरी कमाल २ लाख रुपयांपर्यंत कर्जमुक्तीचा लाभ देण्यात येणार आहे. आधार प्रमाणीकरणावेळी आधार क्रमांक चुकीचा असल्याचे अथवा त्याबाबत असहमती असल्यास संबंधित आपले सरकार सेवा केंद्र, बँक शाखा किंवा नागरी सुविधा केंद्रातील चालक मूळ आधार कार्डाची पडताळणी करून असहमतीची नोंद करतील व संबंधित तक्रार तालुकास्तरीय समितीकडे पाठवून त्याची पावती देतील.

कर्ज खात्याच्या तपशीलाबाबत असहमती असल्यास संबंधित तक्रार जिल्हास्तरीय समितीकडे पाठविण्यात येईल तसेच बँकेने अपलोड न केलेल्या कर्जनुसार खात्याबाबत शेतकर्‍यांनी तहसीलदार किंवा जिल्हा उपनिबंधकांकडे लेखी अर्ज सादर करावा. संबंधित अर्ज जिल्हास्तरीय समितीकडे पाठविण्यात येऊन तपासणीनंतर आवश्यक दुरुस्ती करून बँकेच्या माध्यमातून पोर्टलवरील माहिती अद्ययावत करण्यात येईल. योजनेचा लाभ मिळविण्यासाठी पात्र शेतकर्‍यांनी बायोमेट्रिक (अंगठा) आधार प्रमाणीकरण करून ॲग्रीस्टॅक पोर्टलवर नोंदणीद्वारे फार्मर आयडी तयार करावा, असे आवाहनही सुरवसे यांनी केले.