सिंधुदुर्ग : ​सांगेलीत फणसाच्या झाडाला ‘गिरोबा’ मानून अनोखी प्रतिष्ठापना; लाखो भाविकांच्या उपस्थितीत सोहळा संपन्न

​वृक्ष दैवत्वाची अनोखी परंपरा हिंदू संस्कृतीत: वड, पिंपळ आणि औदुंबर या वृक्षांना पूजनीय मानले जाते. मात्र, सांगेली गावात फणसाच्या झाडाला ग्रामदैवत मानण्याची देशातील ही कदाचित एकमेव आणि दुर्मिळ परंपरा आहे. दरवर्षी होळी पौर्णिमेच्या पूर्वसंध्येला हा विधी पार पाडला जातो.
सर्वप्रथम ग्रामस्थ एकत्र येऊन एका विशिष्ट फणसाच्या झाडाची निवड करतात.निवडलेले झाड कापून त्याला गोलाकार आकार दिला जातो. त्यानंतर वाजत-गाजत, पालखीसह या ‘गिरोबा’ची भव्य मिरवणूक काढली जाते. मध्यरात्रीच्या सुमारास धार्मिक विधी आणि मंत्रोच्चारांच्या गजरात या वृक्षरूपी मूर्तीची मंदिरात प्रतिष्ठापना केली जाते.

गणेशोत्सवाइतकाच शिमगोत्सवाला महत्त्व आहे. सिंधुदुर्ग जिल्ह्यात होळीच्या आदल्या दिवसापासूनच उत्सवाची लगबग सुरू होते. सांगेली येथील ही परंपरा पाहण्यासाठी केवळ सिंधुदुर्गच नव्हे, तर गोवा आणि कर्नाटकातूनही मोठ्या संख्येने भाविक दाखल झाले होते. या सोहळ्यामुळे सांगेली गाव भक्तीच्या रंगात न्हाऊन निघाले असून, निसर्ग आणि देव यांच्यातील अतुट नात्याचे दर्शन पुन्हा एकदा जगाला घडले आहे.