सावंतवाडी : सिंधुदुर्ग जिल्ह्यात आज, मंगळवारी हवामानाने अचानक बदल घेतला असून काही भागांत अवकाळी पावसाने हजेरी लावली आहे. पहाटेपासूनच आकाशात काळे ढग जमा झाले होते, ज्यामुळे वातावरणात प्रचंड उकाडा आणि दमटपणा जाणवत होता.
कुठे झाला पाऊस?
जिल्ह्यातील सह्याद्रीच्या पायथ्याशी असलेल्या कुडाळ तालुक्यातील वेताळ बांबर्डे, नारूर, कुसगाव आणि हिरालोक या परिसरात विजांच्या कडकडाटासह पावसाच्या हलक्या सरी कोसळल्या आहेत. तर दुपारी कणकवली परिसरात अवकाळी पाऊस झाला.पावसाचे प्रमाण जास्त नसले तरी अचानक आलेल्या या वातावरण बदलामुळे नागरिकांची धावपळ उडाली.
शेतकऱ्यांवर संकटाचे सावट
या अवकाळी पावसामुळे फळबागांना फटका बसण्याची शक्यता निर्माण झाली आहे. विशेषतः सध्या हंगामात असलेल्या जांभूळ पिकाचे नुकसान होण्याच्या भीतीने बागायतदार चिंताग्रस्त झाले आहेत. आंबा आणि काजू बागायतदार शेतकरी चिंतेत आहेत.बदलत्या हवामानामुळे इतर फळपिकांवरही रोगांचा प्रादुर्भाव होऊ शकतो, असा अंदाज वर्तवण्यात येत आहे.
हवामान खात्याच्या अंदाजानुसार, जिल्ह्यात पुढील काही तास ढगाळ वातावरण राहणार असून इतर ठिकाणीही पावसाच्या हलक्या सरी कोसळण्याची शक्यता आहे. वाढत्या उष्म्यापासून दिलासा मिळाला असला तरी, शेतकऱ्यांनी आपल्या पिकांची योग्य ती काळजी घेण्याचे आवाहन करण्यात आले आहे.
दरम्यान उष्णता आणि ढगाळ वातावरणामुळे नागरिक, शेतकरी चिंतेत आहेत. यंदाच्या हंगामात बदलत्या हवामानाचा फटका बिगर मोसमात होत आहे त्यामुळे शेतकरी नव्हे तर जनता चिंतेत आहे.
