पारंपरिक वाद्यांचा गजर, लेझीम अन् कर्नाटकी बाहुल्या,सोलापुरात विघ्नहर्त्याचे जल्लोषात स्वागत

बाजारपेठांमध्ये कोट्यवधींची उलाढाल; मूर्तींच्या दरात २० टक्के वाढ…

बाप्पाच्या आगमनानिमित्त टिळक चौक, मधला मारुती, कन्ना चौक, बाळीवेस आणि नवी पेठ परिसरातील मध्यवर्ती बाजारपेठांमध्ये खरेदीसाठी नागरिकांची मोठी गर्दी झाली होती. पूजेचे साहित्य, मखर, रोषणाई आणि फुलांच्या खरेदीला मोठा वेग आला. यंदा कच्च्या मालाच्या दरवाढीमुळे घरगुती व सार्वजनिक मूर्तींच्या दरात सरासरी २० टक्क्यांची वाढ नोंदवण्यात आली. नागरिकांनी लालबागचा राजा, दगडूशेठ अशा विविध आकर्षक रूपांतील मूर्तींना विशेष पसंती दिली.

ग्रामीण भागात २५८ गावांत ‘एक गाव एक गणपती’

जिल्ह्याच्या ग्रामीण भागातही गणेशोत्सवाचा उत्साह शिगेला पोहोचला आहे. जिल्हा पोलीस अधीक्षक अतुल कुलकर्णी यांनी दिलेल्या माहितीनुसार, ग्रामीण कार्यक्षेत्रात एकूण ३ हजार २४६ सार्वजनिक गणेश मंडळांची स्थापना करण्यात आली आहे. विशेष म्हणजे, सामाजिक ऐक्य आणि सलोख्याचे प्रतीक म्हणून ग्रामीण भागातील तब्बल २५८ गावांमध्ये ‘एक गाव एक गणपती’ ही संकल्पना राबविण्यात येत आहे.

शहरात १५०० पोलिसांचा बंदोबस्त; ३३१ सीसीटीव्हींची नजर

गणेशोत्सव शांततेत व सुरळीत पार पाडण्यासाठी पोलीस आयुक्त एम. राजकुमार यांच्या मार्गदर्शनाखाली शहरात सुमारे १५०० हून अधिक पोलिसांचा फौजफाटा तैनात करण्यात आला आहे. मिरवणूक मार्ग आणि गर्दीच्या प्रमुख ठिकाणांवर ३३१ सीसीटीव्ही कॅमेऱ्यांच्या माध्यमातून करडी नजर ठेवली जात आहे. बाजारपेठेतील गर्दी लक्षात घेऊन १३ ते १९ सप्टेंबरदरम्यान टिळक चौक, मधला मारुती, कन्ना चौक आणि माणिक चौक परिसरातील वाहतूक मार्गांत बदल करण्यात आला असून, वाहनधारकांनी पर्यायी मार्गांचा वापर करावा, असे आवाहन पोलीस प्रशासनातर्फे करण्यात आले आहे.

प्रमुख गणपती मिरवणुकांचे आकर्षण…

– आजोबा गणपती  – अखंड हिंदुस्थानातील पहिले सार्वजनिक गणेशोत्सव मंडळ म्हणून ओळखल्या जाणाऱ्या सोलापूरच्या मानाच्या श्री आजोबा गणपतीची सकाळी प्रतिष्ठापना अध्यक्ष आमदार विजयकुमार देशमुख यांच्या हस्ते झाली. सर्वत्र पाऊस पडून शेतकरी बांधवांवरील सर्व संकटे दूर व्हावीत, अशी प्रार्थना करण्यात आली. यावेळी सचिव अनिल सावंत, खजिनदार केदार वनारोटे, सहसचिव गंगाधर गवसने व ट्रस्टचे कार्यकरणी सदस्य गणेशभक्त मोठ्या संख्येने उपस्थित होते..

– श्रीमंत मानाचा कसबा गणपती (बाळीवेस) : चार पुतळा येथून सकाळी साडेनऊ वाजता निघालेल्या या मिरवणुकीत ५०० तरुणांचे लेझीम पथक, कर्नाटकातील बाहुल्यांच्या खेळांचे सादरीकरण, कृत्रिम हत्ती, दोन उंट आणि चार बैलजोड्या मुख्य आकर्षण ठरल्या. चार पुतळा, सरस्वती चौक, मेकॅनिक चौक, नवी पेठ, दत्त चौक व माणिक चौक मार्गे ही मिरवणूक मंदिरात पोहोचली.

– श्री मानाचा अय्या गणपती (बाळीवेस) : माणिक चौकातून दुपारी निघालेल्या मिरवणुकीत तब्बल १२०० तरुणांचे भव्य लेझीम पथक सहभागी झाले होते.

– सोन्या मारुती मंडळ : बाळीवेस, मंगळवार पेठ चौक, सराफ बाजार मार्गे निघालेल्या या मिरवणुकीत ५०० तरुणांच्या शिस्तबद्ध लेझीम पथकाने उपस्थितांची मने जिंकली.