यशवंतरावांना सुनेत्रा पवारांसह, मान्यवरांचे जयंतीदिनी अभिवादन

माजी उपपंतप्रधान यशवंतराव चव्हाण यांच्या ११३ व्या जयंतीदिनी सुनेत्रा पवार यांच्यासह राज्याचे माजी सहकारमंत्री बाळासाहेब पाटील, राष्ट्रवादी काँग्रेसचे नेते सारंग पाटील, जिल्हाध्यक्ष बाळासाहेब सोळसकर, विक्रमबाबा पाटणकर, जिल्हाधिकारी संतोष पाटील, पोलीस अधीक्षक तुषार दोशी, मुख्य कार्यकारी अधिकारी याशनी नागराजन, कराडचे उपनगराध्यक्ष प्रताप साळुंखे, मुख्याधिकारी प्रशांत व्हटकर आदींनी यशवंतराव चव्हाण यांच्या समाधीला पुष्पांजली वाहून अभिवादन केले.

राष्ट्रवादी काँग्रेसचे पदाधिकारी, कार्यकर्त्यांसह यशवंतप्रेमींची या वेळी मोठी उपस्थिती होती. दरम्यान, समाधी परिसरात शाळकरी मुली व शिक्षिकांनी सुनेत्रा पवार यांच्याशी नमस्ते, नमस्ते अशी हाक हस्तांदोलनाचा प्रयत्न केला असता, पवारांनीही त्यास प्रतिसाद दिला. त्यामुळे या शाळकरी मुली हरकल्या आणि भावनिक क्षण टिपण्यासाठी माध्यमांचे कॅमेरेही गर्दी करून राहिले.

(शब्द सुरांची आदरांजली)

यशवंतराव चव्हाण यांच्या जयंतीनिमित्त समाधी परिसरातील हिरवळीवर ‘शब्द सुरांची भावपूर्ण आदरांजली’ या कार्यक्रमाद्वारे स्वर्गीय यशवंतराव चव्हाणांच्या विचार अन् कार्याला संगीतातून उजाळा देण्यात आला. या विशेष कार्यक्रमाला उपमुख्यमंत्री सुनेत्रा पवार व मान्यवरांनी उपस्थिती लावली.

(यशवंत विचारांवर वाटचाल- सुनेत्रा पवार)

महाराष्ट्राचे श्रध्दास्थान असलेले यशवंतराव चव्हाण यांचे समाधीस्थळ हे अजितदादांचे शक्तिस्थळ, स्फूर्तीस्थान होते. चव्हाणसाहेबांच्या विचारांवर त्यांची वाटचाल राहिली होती. मी सुद्धा याच पद्धतीने वाटचाल करण्याचा सर्वांना शब्द देते अशी ग्वाही सुनेत्रा पवार यांनी माध्यमांशी बोलताना दिली. आज माझं मन भरून येतयं अशा भावन्याही त्यांनी व्यक्त करत अजित पवारांच्या आठवणींना उजाळा दिला.

अजित पवार हे यशवंतराव चव्हाण यांचे विचारांवर वाटचाल करत होते. मी सुध्दा ही वाटचाल कायम ठेवणार आहे. उपमुख्यमंत्री म्हणून शपथ घेतल्यानंतर दोन फेब्रुवारीला कर्तव्यनिष्ठ म्हणून मी इथे चव्हाणसाहेबांच्या समाधीला अभिवादन करून, नवी राजकीय वाटचाल सुरु करण्यासाठी आल्याचे सुनेत्रा पवार यांनी सांगितले.