Video : अजित पवारांच्या आईची परवानगी घेऊन सुप्रिया सुळे दिल्लीला रवाना! शपथविधीच्या प्रश्नावर हात जोडून म्हणाल्या…

सायंकाळी ५ वाजण्याच्या सुमारास मुंबईत सुनेत्रा पवार यांच्या शपथविधीची लगबग सुरू होती. यावेळी सुप्रिया सुळेंनी अजित पवारांच्या आईची भेट घेऊन बाहेर पडल्या. यावेळी त्यांना या भेटीबद्दल प्रश्न विचारण्यात आला.

भेटीबद्दल सुप्रिया सुळे काय म्हणाल्या?

यावेळी सुप्रिया सुळे म्हणाल्या की, “उद्या बजेट सेशन आहे, त्यामुळे मी आशाकाकींना भेटायला गेले. आशाकाकींची परवानगी घेतली, की आशा काकी उद्या बजेट सेशन आहे, मी जाऊ का? आशा काकी म्हणाल्या, हो, देशाचं बजेट आहे, आणि मी राष्ट्रवादी काँग्रेस पक्षाची फ्लोअर लीडर आहे. मी काकींची परवानगी घेऊन आज दिल्लीला जात आहे.”

दरम्यान मुंबईतील सुनेत्रा पवार याच्या शपथविधीबद्दल आपल्याला विश्वासात घेतले नाही का? तसेच या शपथविधीला शरद पवार का नाहीत? याबद्दल सुप्रिया सुळेंना जेव्हा प्रश्न विचारण्यात आला तेव्हा मात्र त्यांनी हात जोडून “राम कृष्ण हरी” अशी प्रतिक्रिया दिली.

सुनेत्रा पवार महाराष्ट्राच्या पहिल्या महिला उपमुख्यमंत्री

अजित पवार यांच्या अपघाती निधनानंतर आज (शनिवारी) त्यांच्या पत्नी सुनेत्रा पवार यांनी उपमुख्यमंत्रिपदाची शपथ घेतली. त्या महाराष्ट्राच्या पहिल्या महिला उपमुख्यमंत्री बनल्या आहेत. अत्यंत साध्या पद्धतीने झालेल्या या शपथविधी कार्यक्रमाला मुख्यमंत्री देवेंद्र फडणवीस, उपमुख्यमंत्री एकनाथ शिंदे यांच्यासह दोन्ही पक्षांचे नेते उपस्थित होते.

सुनेत्रा पवार या राज्याच्या ११ व्या उपमुख्यमंत्री बनल्या आहेत. त्यांच्याकडे राज्य उत्पादन शुल्क, क्रीडा आणि युवक कल्याण आणि अल्पसंख्याक विकास या तीन खात्यांची जबाबदारी सोपवण्यात आली आहे. तर अजित पवारांकडे असलेली नियोजन आणि वित्त ही खाती मुख्यमंत्री देवेंद्र फडणवीस यांनी स्वत:कडे ठेवली आहेत.