तासगावचे उद्योजक अशोक खाडे यांना पद्मश्री जाहीर

तासगाव तालुक्यातील पेड येथे सामान्य ग्रामीण कुटुंबात जन्म झालेल्या अशोक खाडे यांनी उद्योग क्षेत्रात आंतरराष्ट्रीय स्तरावर गाठलेली उंची अद्वितीय अशी आहे. उद्योग व व्यापार क्षेत्रातील त्यांच्या योगदानाबद्दल राष्ट्रपतींच्या हस्ते त्यांना पद्मश्री पुरस्काराने सन्मानित करण्यात येणार आहे.

अशोक खाडे हे दास ऑफशोअर या कंपनीचे व्यवस्थापकीय संचालक (एम.डी.) आहेत. सामान्य परिस्थितीतून कष्ट आणि जिद्दीच्या जोरावर त्यांनी शून्यातून विश्व निर्माण केले आहे. खाडे यांचा सन १९५५ मध्ये तासगाव तालुक्यातील पेड येथे जन्म झाला. त्यांच्या आई-वडिलांनी त्यांना मोठ्या कष्टातून शिक्षण दिले.

खाडे यांनी यांत्रिक विभागामध्ये मध्ये पदविका शिक्षण घेतले. खाडे यांनी स्थापन केलेली दास ऑफशोअर इंजिनियरिंग ही कंपनी तेल आणि वायू उद्योगसाठी फॅब्रिकेशन सुविधा पुरवते. अनेक सामाजिक संस्था व त्यांच्या कार्याशी अशोक खाडे जोडले गेले आहेत. समाजातील अनेक गरजू व्यक्ती तसेच समाजउपयोगी कार्य करणाऱ्या संस्थांना त्यांनी मोठी मदत केली आहे. त्यांच्या या कार्याची दखल घेऊन त्यांना पद्मश्री पुरस्कार जाहीर करण्यात आला आहे.