रत्नागिरी : रत्नागिरी विधानसभा निवडणुकीतील पराभवाचे पडसाद शिवसेना ठाकरे गटात उमटू लागले आहेत. रत्नागिरी विधानसभेत गद्दारी करणाऱ्या लोकांचा पाढा वाचल्यावर ठाकरे गटाचे पदाधिकारी एकमेकांना चांगलेच भिडले. हा प्रकार माजी खासदार विनायक राऊत यांच्या उपस्थितीत झाल्याने आश्चर्य व्यक्त करण्यात येत आहे.
रत्नागिरीमधील ठाकरे गटाचे पदाधिकारी एकमेकांना भिडल्याने रत्नागिरीत हा चर्चेचा विषय बनला आहे. यामध्ये जिल्हा प्रमुख विलास चाळके यांना टार्गेट केल्याचे बोलले जात आहे. याप्रकारानंतर जिल्हा प्रमुख विलास चाळके यांनी राजीनामा देण्याचे जाहीर केले.
राज्यातील विधानसभा निवडणूक संपल्यावर शिवसेना ठाकरे गटाचे माजी खासदार विनायक राऊत रत्नागिरी दौऱ्यावर आले होते. त्यांनी रत्नागिरी शिवसेना कार्यालयात पदाधिकाऱ्यांची बैठक बोलावली होती. या बैठकीत विषय मांडत असताना एका पदाधिकाऱ्याने गद्दारी कोणी कोणी केल्याचे सांगण्यास सुरुवात केली. त्यानंतर वादाची ठीणगी पडली. या वादामध्ये जिल्हा प्रमुख विलास चाळके यांना टार्गेट करण्यात येऊन त्यांना मारहाण करण्याचा प्रयत्न करण्यात आला. हा सगळा प्रकार माजी खासदार विनायक राऊत यांच्या समोर घडल्याने त्यांनी हा विषय आवरता घेतला. यावेळी माजी आमदार बाळ माने हे सुद्धा उपस्थित होते. शिवसेना कार्यालयात घडलेल्या प्रकाराबद्दल पदाधिकाऱ्यांनी तीव्र नाराजी आणि संताप व्यक्त केला आहे.
यासर्व प्रकारानंतर शिवसेना ठाकरे गटाचे तालुकाप्रमुख प्रदिप साळवी यांनी आपण आपल्या राजीनामा देत असल्याचे सांगितले. नवीन लोकांना संधी मिळाली पाहिजे म्हणून आपण राजीनामा देत असल्याचे तालुकाप्रमुख साळवी यांनी स्पष्ट केले. शिवसेना कार्यालयात झालेल्या या राड्यानंतर जिल्हाप्रमुख विलास चाळके ही राजीनामा देण्याच्या तयारीत असून घडलेल्या प्रकाराबद्दल त्यांनी तीव्र संताप व्यक्त केला.
