लोकसत्ता वार्ताहर

वाई :  जागतिक पातळीवर संवेदनशील भाग म्हणून ज्याची घोषणा करण्यात आली आहे, अशा कास पठारावर पर्यटन महोत्सवाच्या नावाखाली नियमबाह्य पद्धतीने मनोरंजनाचे व खाद्य महोत्सवाचे आयोजन करण्यात आले आहे. यासाठी मोठय़ा प्रमाणात पर्यटकांना आकर्षित करण्यासाठी लेझर शो, संगीत, नाचगाण्याचे कार्यक्रमांचे आयोजन केले असून त्यासाठी डीजेचा वापर करण्यात येणार असल्याचे समजते. या कार्यक्रमाचे आयोजन जरी खासगी पातळीवर होत असले तरी त्याला शासनाच्या विविध विभागांचे सहकार्य असल्याचे या महोत्सवाच्या प्रसिद्धी साधनांवरून समजते. महाबळेश्वर, पाचगणी, भिलार, माथेरान येथे होत असलेल्या पर्यटन महोत्सवाच्या धर्तीवर या महोत्सवाचे ७ ते १० ऑक्टोबर या कालावधीत आयोजन करण्यात आले आहे. यासाठी किमान पंधरा हजार पर्यटक उपस्थित राहतील अशी अपेक्षा आहे.