आवडती अभिनेत्री कोण? प्रश्न विचारताच तुकाराम मुंढे हसले आणि म्हणाले; “मी..”

तुकाराम मुंढेंनी सांगितलेला मित्राचा किस्सा काय?

अन्न आणि प्रशासन विभागाचे आयुक्त तुकाराम मुंढे बोलताना म्हणाले की, “मला ते वर्ष नीट आठवत नाही… पण १९९८ किंवा ९९ चा काळ असेल… तेव्हा मी मेन्सचा अभ्यास करत होतो आणि पॅरासाईट म्हणून राहत होतो. तेव्हा आमची एक सवय होती, प्रत्येकाचं अभ्यास करायला बसायचं एक ठिकाण ठरलेलं असायचं, माझा एक मित्र होता, आता त्याचं नाव सांगू की नको, असाही प्रश्न आहेच… कारण ते वहिनींनी ऐकलं तर प्रॉब्लेम व्हायचा. पंकज म्हणून माझा मित्र आहे, तो आता कस्टममध्ये कमिशनर आहे.” असं म्हणत मित्राचा किस्सा तुकाराम मुंढेंनी सांगितला.

पंकज आला आणि रडू लागला..

पुढे मुंढे म्हणाले, “आम्ही दोघंही उशिरापर्यंत अभ्यास करायचो, तो माझ्यापेक्षा एक दोन तास उशिरा झोपायचा… मी रात्रीचे दोन तीन वाजेपर्यंत झोपायचो, तो साधारण तीन-चार वाजता झोपायचा आणि थोडं उशिरा उठायचा… मी सकाळी उठल्यावर पुन्हा अभ्यासाला बसायचो. मी रुम आणि लायब्ररीच्या कॉरीडॉरमध्ये अभ्यास करायचो. तेव्हा साधारण, दहा साडेदहा वाजले असतील… तेव्हा पंकज पाठीमागून आला, त्यानं माझ्या गळ्यात हात घातला आणि रडू लागला… त्याला रडताना पाहून मला शॉक बसला, मी त्याला विचारलं काय झालं? पण तो रडत होता, तेव्हा त्याच्या डोळ्यात अश्रू होतं की नाही माहीत नाही, पण तो तसा आवाज काढत होता…”, असं तुकाराम मुंढे म्हणाले. “मी त्याला विचारलं काय झालं, मला भीती वाटायला लागली की, याला काय झालं, मी अभ्यासात गुंग असताना अचानक तो काहीतरी सांगत होता. मग तो मला म्हणाला पेपर वाचला का? मग मी वाचून बघितला, तेव्हा मला त्यात काही दिसलं नाही, त्यामुळे मी त्याला पुन्हा विचारलं काय झालं? का रडतो? तेव्हा तो म्हणाला, अरे माधुरीचं लग्न झालं… मग मी म्हटलं मग काय झालं? मग तो म्हणाला, माधुरी दीक्षित… असे प्रसंग आमच्यात घडलेत. हा किस्सा सांगताच उपस्थितांमध्ये हशा पिकला.

आवडती अभिनेत्री कोण? यावर काय म्हणाले तुकाराम मुंढे?

यानंतर तुमची आवडती अभिनेत्री कोण असा प्रश्न अरविंद जगताप यांनी विचारला त्यावर “हे सांगायची डेरींग मी सध्या करणार नाही. माझा व्यवस्थित संसार सुरू आहे…”, असं तुकाराम मुंढे म्हणाले. त्यांच्या या उत्तरामुळेही मुलाखतीला उपस्थित असलेले सगळेच खळखळून हसले.