सोलापूर : विलक्षण अटीतटीच्या होणाऱ्या निवडणुकीमध्ये प्रमुख उमेदवारांना त्यांच्या नामसदृश अन्य उमेदवारांचा फटका बसण्याची शक्यता असते. असे नामसदृश उमेदवार तुल्यबळ उमेदवारांना अडचणीत आणण्यासाठी जाणीवपूर्वक उभे केले जातात. त्यामागे बोलवते धनी वेगळेच असतात. सोलापूर जिल्ह्यात माढा आणि करमाळा या दोन विधानसभा मतदारसंघांमध्ये तुल्यबळ उमेदवारांना नामसदृश उमेदवारांमुळे अडचणींचा सामना करावा लागण्याची शक्यता वर्तवली जात आहे.
माढा मतदारसंघांमध्ये ज्येष्ठ आमदार बबनराव शिंदे यांनी राजकीय वाऱ्याची दिशा पाहून राष्ट्रवादी अजित पवार पक्षाची साथ सोडत आणि स्वतः रिंगणात न उतरता पुत्र रणजित शिंदे यांना अपक्ष रिंगणात उतरविले आहे. त्यांची सत्त्वपरीक्षा होणार आहे. त्यांच्यासमोर राष्ट्रवादी काँग्रेस शरद पवार पक्षाचे अभिजित धनंजय पाटील यांचे तगडे आव्हान आहे. परंतु या लढतीमध्ये अभिजित पाटील यांच्यासह अन्य तीन अभिजित पाटील अपक्ष उमेदवार आहेत. राष्ट्रवादी शरद पवार पक्षाचे अधिकृत उमेदवार अभिजित धनंजय पाटील यांच्यासह अभिजित धनवंत पाटील हे बसपचे उमेदवार आहेत. दोघांच्याही नावामध्ये बरेच साधर्म्य दिसून येते. शिवाय अभिजित तुळशीराम पाटील आणि अभिजित अण्णासाहेब पाटील असे अन्य दोन अपक्ष उमेदवार आहेत.
दुसरीकडे वजनदार अपक्ष उमेदवार रणजित बबनराव शिंदे यांचे नामसाधर्म्य असलेले रणजित भैया शिंदे निवडणूक रिंगणात आहेत. रणजित बबनराव शिंदे यांना प्रेमाने रणजित भैया या नावाने संबोधले जाते. अभिजित पाटील आणि रणजित शिंदे हे दोघेही तुल्यबळ प्रतिस्पर्धी असताना त्या दोघांच्या नामसदृश उमेदवारांचा फटका नेमका कोणाला बसणार, याबद्दल राजकीय वर्तुळात उत्सुकता दिसून येते.
करमाळ्यातही नामसदृश उमेदवाराचा फटका तेथील अपक्ष आमदार संजय विठ्ठलराव शिंदे यांना बसण्याची शक्यता वर्तवली जात आहे. तेथे संजय लिंबराज शिंदे आणि संजय वामन शिंदे असे अन्य दोन उमेदवार आहेत. यापूर्वी २०१४ च्या करमाळा विधानसभा निवडणुकीत आमदार संजय शिंदे यांच्याशी नामसाधर्म्य असलेले दोन उमेदवार उभे होते. त्याचा फटका आमदार शिंदे यांना बसला होता.
