लोकसत्ता प्रतिनिधी अकोला : बुलढाणा जिल्ह्यातील मलकापूर शहरात पाण्यात बुडून दोन मुलींचा मृत्यू झाल्याची घटना शुक्रवारी घडली. मलकापूर शहरातील म्हाडा कॉलनीमधील कांचन बामंदे (१४), शुभांगी दुतोंडे (१०) व नेहा वानखडे (१२) या तीन मुली कपडे धुण्यासाठी उघडा मारूती मंदिर जवळच असलेल्या खदानवर गेल्या होत्या. त्यापैकी एका मुलीचा पाय घसरल्याने ती पाण्यात बुडाली, तर दोघींनी आपली मैत्रीण बुडत असल्याचे बघून तिला वाचवण्याचे प्रयत्न केले. त्या दोघींचाही तोल जाऊन त्या पाण्यात पडल्या. परिसरातील नागरिकांनी तात्काळ घटनास्थळावर धाव घेतली. या घटनेत कांचन बामंदे व शुभांगी दुतोंडे या दोघींचा मृत्यू झाला, तर नेहा वानखडे हिला वाचवण्यात यश आले आहे. पोलिसांनी स्थानक युवकांच्या मदतीने दोन्ही मुलींचे मृतदेह खदानी बाहेर काढले. ते उत्तरीय तपासणीसाठी रुग्णालयात पाठविण्यात आले. पुढील तपास पोलीस करीत आहेत.
