अलिबाग - अलिबाग समुद्र किनाऱ्यावर मंगळवारी बैलगाडी स्पर्धेदरम्यान जखमी झालेल्या दोघांचा उपचारादरम्यान मृत्यू झाला आहे. विनायक जोशी आणि राजाराम गुरव, अशी मृतांची नावे आहेत. गेल्या सहा महिन्यांत बैलगाडी शर्यतीदरम्यान झालेली ही चौथी दुर्घटना आहे. त्यामुळे बैलगाडी स्पर्धेतील प्रेक्षकांच्या सुरक्षेचा मुद्दा चर्चेत आला आहे. धुळवडीच्या सणाचे औचित्य साधून मंगळवारी अलिबाग समुद्र किनाऱ्यावर बैलगाडी स्पर्धेचे आयोजन करण्यात आले होते. या स्पर्धेदरम्यान बैल उधळून बैलगाडी प्रेक्षकांमध्ये घुसली. विनायक जोशी (वय ७०) रा. ब्राम्हण आळी, अलिबाग आणि राजाराम गुरव (वय ७५) रा. झिराड, अलिबाग हे दोघे गंभीर जखमी झाले होते. जखमी अवस्थेत दोघांनाही अलिबाग येथील रुग्णालयात दाखल करण्यात आले होते. मात्र दोघांची प्रकृती चिंताजनक असल्याने दोघांनाही पुढील उपचारासाठी मुंबईत हलविण्यात आले होते. यापैकी विनायक जोशी यांचा मुंबईत नेत असतांनाच रात्री मृत्यू झाला, तर राजाराम गुरव यांचे बुधवारी सकाळी उपचारादरम्यान निधन झाले. हेही वाचा - महिला योजनांसाठी अर्थसंकल्पात स्वतंत्र तरतूद करावी, आमदार माधुरी मिसाळ यांची मागणी हेही वाचा - पुणे: मेहनत घेत असतानाच मल्लाचे निधन या दुर्घटनेप्रकरणी अलिबाग पोलीस ठाण्यात स्पर्धेच्या आयोजकांविरोधात सदोष मनुष्यवधाचा गुन्हा दाखल करण्यात आला आहे. पोलीस निरीक्षक शैलेश सणस या प्रकरणाचा तपास करत आहेत. गेल्या सहा महिन्यांत बैलगाडी स्पर्धेदरम्यान झालेली ही चौथी दुर्घटना आहे. त्यामुळे बैलगाडी स्पर्धेदरम्यान प्रेक्षकांच्या सुरक्षेचा मुद्दा प्रकर्षाने समोर आला आहे.
