ठाकरेंचे कोणते खासदार फुटणार? ‘ऑपरेशन टायगर’मुळे मातोश्रीवर धाकधूक; ‘या’ ४ नावांची सर्वाधिक चर्चा!

इंडियन एक्स्प्रेसने सूत्रांच्या हवाल्याने दिलेल्या वृत्तानुसार, उद्धव ठाकरेंच्या नऊ खासदारांपैकी तब्बल सात खासदार फुटण्याच्या मार्गावर असून केवळ अरविंद सावंत आणि अनिल देसाई हे दोघेच उद्धव ठाकरे यांच्यासोबत राहण्याची शक्यता आहे. तर, बंडखोर खासदारांपैकी चार जण दिल्लीत असून ते बुधवारी सकाळी लोकसभा अध्यक्ष ओम बिर्ला यांची भेट घेण्याची शक्यता आहे. सभागृहात त्यांना एक स्वतंत्र गट म्हणून मान्यता देण्याची विनंती करणारे पत्र ते अध्यक्षांना सादर करतील अशी अपेक्षा आहे. दरम्यान, ठाकरेंचे ते सात खासदार कोण याबाबतही चर्चा आहे.

मातोश्रीवरील बैठकीत कोण कोण हजर होतं?

ऑपरेशन टायगर रोखण्याकरता मातोश्रीवर रविवारी खासदारांची बैठक बोलावण्यात आली होती. या बैठकीला ९ पैकी चारच खासदार प्रत्यक्ष उपस्थित होते. चार खासदारांनी व्हिडिओ कॉन्फरन्सिंगद्वारे बैठकीला हजेरी लावली, तर एका खासदाराने फोनवरून उद्धव ठाकरेंशी संवाद साधल्याचे सांगितलं गेलं.

मुंबई उत्तर-पूर्वचे खासदार संजय दिना पाटील आणि नाशिकचे खासदार राजाभाऊ वाजे यांनी ‘द इंडियन एक्सप्रेस’ला सांगितलं की, ते उद्धव यांच्यासोबत ठामपणे उभे आहेत आणि आपापल्या मतदारसंघातच आहेत. उस्मानाबादचे खासदार ओमराजे निंबाळकर पुण्यात असून, त्यांचे चुलत भाऊ आणि काँग्रेस नेते पवनराजे निंबाळकर यांच्या २००६ मधील हत्या प्रकरणातील न्यायालयीन कामकाजात दिवसभर व्यस्त होते. मात्र, खासदार संजय जाधव, संजय देशमुख, बाबासाहेब वाकचौरे आणि नागेश अष्टिकर हे रात्री उशिरापर्यंत संपर्काबाहेर होते.

ठाकरेंचे हे चार खासदार दिल्लीत पोहोचल्याचा दावा

• संजय जाधव (परभणी)
• संजय देशमुख (यवतमाळ-वाशीम)
• भाऊसाहेब वाकचौरे (शिर्डी)
• नागेश पाटील आष्टीकर (हिंगोली)

हे खासदारही फुटण्याच्या मार्गावर?

• ओमराजे निंबाळकर (धाराशिव)
• संजय दिना पाटील (ईशान्य मुंबई)

मी उद्धव ठाकरेंबरोबरच! — राजाभाऊ वाजे

दरम्यान, बंडखोर सात खासदारांमध्ये राजाभाऊ वाजे यांचंही नाव घेतलं जात होतं. मात्र, त्यांनी आज ट्रेनमध्येच माध्यमांशी संवाद साधून याबाबत स्पष्ट केलं. ते म्हणाले, “मी एका बैठकीसाठी दिल्लीत आलो आहे. मी कोठेही जाणार नाहीय, मी उद्धव ठाकरेंबरोबरच आहे. आम्ही सर्व बरोबर आहोत, आणि राहू असं मातोश्रीवरील बैठकीत ठरलं होतं. मला एकनाथ शिंदेंनीही संपर्क केला नाही. माझ्याशी संपर्कच झाला नाही, त्यामुळे १५ कोटीची ऑफर कोण देईल? मी उद्धव बाळासाहेब ठाकरे यांच्याबरोबर आहे आणि त्यांच्याबरोबरच राहीन.