सांगली : म्हैसाळमध्ये झालेल्या वनमोरे कुटुंबातील ९ जणांच्या हत्याकांड प्रकरणी सोलापुरातील एका महिलेला पोलीसांनी आज मंगळवारी अटक केली. मुख्य संशयित असलेल्या अब्बास बागवान या मांत्रिकाची ही महिला बहिण आहे. म्हैसाळ येथील डॉ. माणिक वनमोरे व त्यांचा भाऊ पोपट वनमोरे या दोन कुटुंबातील ९ जणांचे २० जून रोजी हत्याकांड झाले. गुप्तधन काढून देण्यासाठी मांत्रिक बागवान यांने वनमोरे कुटुंबाकडून लाखो रुपये उकळले होते. यातूनच बागवान यांने कुटुंबातील ९ जणांची विष देऊन हत्या केल्याचे तपासात समोर आले. या गुन्ह्यात मदत केल्या प्रकरणी आज जैतूनबी उर्फ जैतूबाई महमंद हनिफ बागवान (वय ६० रा. अमन अपार्टमेंट, मुस्लिम बादशा पेठ, सोलापूर) या महिलेला अटक करण्यात आली. न्यायालयासमोर तिला हजर केले असता ११ ऑगस्टपर्यंत पोलीस कोठडीत ठेवण्याचे आदेश मिळाले. पुढील तपास उप अधिक्षक अशोक विरकर हे करीत आहेत.