लातूर जिल्ह्यातील तळेगाव बोरी येथे एका महिलेने तिच्या दोन चिमूरड्यांना फाशी देऊन स्वतः आत्महत्या केल्याची घटना घडली आहे. महिलेच्या आत्महत्येचे कारण अद्याप अस्पष्ट असून या घटनेचा पोलीस अधिक तपास करत आहे. शिरुर अनंतपाळ तालुक्यातील तळेगाव बोरी येथे संजीवनी गाडेकर ही महिला तिच्या दोन मुल आणि पतीसह राहत होती. बुधवारी संध्याकाळी चार वर्षांचा राजवीर आणि सहा वर्षांची छकूलाी या दोघा लहान मुलांना तिने फाशी दिली. यानंतर स्वतःदेखील गळफास घेऊन आत्महत्या केली. या घटनेचे वृत्त समजताच पोलिसांनी घटनास्थळी धाव घेतली आहे. महिलेचा पती हा वाहनचालक असून आत्महत्येच्या वेळी तो घरात नव्हता. या घटनेने परिसरात खळबळ माजली आहे.